شنگھائی ۔ 03اپریل (اے پی پی) چارشنبے نا سہب چین نا علاقہ تائیوان اٹی ہوالین نا خڑک سمندر اٹی بروک آ7.3 شدت نا زمی جمب اٹی چار بندغ زوال و پین 97 ٹھپی مسر۔ شنہوا فائرڈیپارٹمنٹ نا حساب وکتاب نا حوالہ ءِ ترسا پارے کہ فوجیان، گوانگ ڈونگ، شنگھائی، زی جیانگ و جیانگ سوآن بیدس مچ آ تائیوان اٹی زمی جمب نا ترند لوڈو محسوس کننگا ہوالین اٹی چندی ہنکینی ماڑی تمار ہراٹی ہزار آبندغ آتے رکھ ہند آتیا گدریفنگا۔ مشی آ علاقہ غاتیٹی ہم خل تا تمنگ ناحوال آک ءُ۔ زمی جمب آن پد کیہی علاقہ غاتیٹی زیر زمین نقل وحمل معطل مس۔ زمی جمب ناشدت 7.2 ئس و 21 ستمبر1999 آ بروک آ مہلک زمی جمب آن پد آن 25 سال آتیٹی جزیرہ غا بروک آ غٹ آن ترند زمی جمب گوندنگانے۔ چین نا زمی جمب پیما نیٹ ورکس سینٹر نا رداٹ زمی جمب چارشنبے نا سہب انا 7:58آبس و دانا مرکز ڈغارنا کچ آن 15.5 کلومیٹرنا گہرائی ٹی ئس۔ اوپارے کہ زمی جمب آن پد سونامی نا لہرہم ودی مس۔ تائیوان نا موسمیاتی ایجنسی نا رداٹ زمی جمب آن پد علاقہ ٹی کیہی آفٹر شاکس بسنے و بروک آمنہ دے اٹی علاقہ ٹی پین آفٹرشاکس نا خطرہ ءِ ، ہرافتا شدت ریکٹر اسکیل آ 7 درجہ اسکان مننگ کیک۔
