اسلام آباد۔ 03 اپریل (اے پی پی) ملائیشیا تون پاکستان نا واپار نا فاضل کچ اٹی برجامالی سال اٹی ودکی مسنے، مالی سال نا اولیکو 8 تُو اٹی ملائیشیا ءِ پاکستانی برآمد آتیٹی سالانہ بنداو تیا 118 درسد نا ودکی وخت اس کہ درآمد آتیٹی 14 درسد نا کمتی مسنے ۔ اسٹیٹ بینک و پاکستان بیورو شماریات نا کنڈآن جاری کروک حساب وکتاب نا رداٹ برجامالی سال نا اولیکو 8 تُواٹی ملائیشیاءِ برآمد آتیان ملک ءِ 413.64 ملین ڈالر نا زرمبادلہ دوئی مس ہرا تدوک آ مالی سال انا ہندا مد انا مقابلہ ٹی 118 درسد زیات ءُ، تدو ک آ مالی سال نا ہندا مد اٹی ملائیشیا ءِ 189.93 ملین ڈالر نا برآمد ریکارڈ کننگاسس۔ فروری ٹی ملائیشیا ءِ پاکستانی برآمد آتا کچ 53.92ملین ڈالر ریکارڈ کننگا ہرا جنوری ٹی 84.07 ملین ڈالر و تدوک آ سال فروری ٹی 17.75 ملین ڈالر ئسر، مالی سال 2023ٹی ملائیشیا ءِ برآمد آتیان ملک ءِ 299.013 ملین ڈالر نا زرمبادلہ دوئی مسوسس۔ حساب وکتاب نا رداٹ برجامالی سال نا اولیکو 8 تُو اٹی ملائیشیا غان درآمد آتیٹی سالانہ بنداو تیا 14.14 درسد نا کمتی مسنے، جولائی آن ہلیس فروری 2024 اسکان نا مد اٹی ملائیشیا غان درآمد آتیا 646.83 ملین ڈالر نا زرمبادلہ خڑچ مس ہرا تدوک آ مالی سال نا ہندا مد اٹی 738.56 ملین ڈالر ئسر۔ فروری ٹی ملائیشیا ءِ پاکستانی برآمد آتا کچ 104 ملین ڈالر ریکارڈ کننگا ہرا جنوری ٹی 63.59 ملین ڈالر و تدوک آ سال فروری ٹی 96.29 ملین ڈالر ئسر، مالی سال 2023 اٹی ملائیشیا غان درآمد آتیا 1.021 ارب ڈالر نا زرمبادلہ خڑچ مسوسس۔
