اسلام آباد۔ 03اپریل (اے پی پی) صدر مملکت آصف علی زرداری سنگاپورناکاروباری ادارہ غاتون ہڑتوم آکنڈآتا واپاری و کاروباری رابطہ غاتا مون آ دننگ کن کاریم کننگ نا گرج آ زور شاغساپارینے کہ پاکستان پراسیسڈ خور و سی فوڈ اٹی سنگاپور کن پائیدار رسد نا ذریعہ جوڑ مننگ کیک۔ ایوان ءِصدر نا پریس ونگ آن جاری بیان نا رداٹ صدر مملکت داخیال آتا درشانی ءِ سنگاپور اٹی پاکستان نا پندار ہائی کمشنر رابعہ شفیق تون گپ وتران کرسا کرے ہرا چارشنبے نادے آ داڑے ایوان صدر اٹی اوڑتون اوڑدہی کرے۔ صدر پارے کہ سنگاپور نا کاروباری ادارہ غاتے پاکستان نا زرکاری دوست پالیسی تیان فائدہ ہرفنگ نا ترغیب تننگ نا گرج ءِ۔ صدر مملکت پارے کہ سنگاپور اٹی پاکستانی خور و کشاری مصنوعات آتا برآمد آتا وارخواہی پٹنگے۔ پاکستان پراسیسڈ خور و سی فوڈ اٹی سنگاپور کن پائیدار رسد نا ذریعہ جوڑ مننگ کیک۔ آصف علی زرداری پارے کہ پاکستانی افرادی قوت سنگاپور آ گدریفنگ، آئی ٹی و کشت و کشار اٹی ہڑتوم آ کنڈآتا کمکاری ءِ ودفنگ کن کاریم کننگ نا گرج ءِ۔ صدر مملکت رابعہ شفیق ءِ بطور پاکستانی ہائی کمشنر تعیناتی آ مبارکبادی تس و اوڑکن نیک است خواہی نا درشانی ءِ کرے۔
