کوئٹہ۔ 02 اپریل (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر اسہ خصوصی بیان اسے ٹی پارینے کہ چین پاکستان اٹ اڑزان سولر سسٹم نا تیاری کن اوٹی کاریم اٹ اتوک آ پینل ، کنورٹرز و بیٹری تتون اوار غٹ ازباب تیارکروک آکارخانہ غاتے پاکستان اٹ خلنگ کن آمادگی ظاہرکرینے۔ سولر سسٹم تیاری نا چرجوئی ٹی چینی کمامدارآتون گپ وتران بناکرینے۔ برجاتُو پاکستان نا بڑزکو کہول ڈل چینی سرکڑدہ غاتون مذاکرات کن بیجنگ آ کاہک تو دا بابت پین پیش رفت مریک۔ اوپارے کہ چین و گڑاس یورپی ملک آک سولر سسٹم نا مصنوعات نا اڑزان نرخ آتیٹی فراوانی آ اجارہ قائم کرینے، ایلو ملک آتا صنعت کارآک اونا مقابلہ ءِ کننگ کپسہ، وخت اس کہ چین اتون تینا و ایلو ملک آتا گیشتر منڈی دوئی ءِ ہراڑے مصنوعات نا بھلو کچ اسے آ کھپت نا سوب آن دانا پیدواری خڑچ کم مریک ۔ دا آسراتی پاکستان کون آ ملک آتے دوئی اف ہندا سوب ءِ کہ چین ءِ پاننگانے کہ اونا نجی یا سرکاری بشخ پاکستان اٹی سولر سسٹم نا صنعت خلے۔ اوپارے کہ پاکستان اٹی الس کبین دام دوئی کروک آ بجلی آن بھاز تنگ ءِ سولر سسٹم اگہ جوان نرخ آتیا دوئی مریک تو الس اودے بجلی نا وخت آ رسینگ نا گیگ بدل نظام نا وڑاٹ اختیار کیک۔ اینو ہم ملک انا چندی شار تیٹی 8 آن 10 گھنٹہ اسکان بجلی نا لوڈشیڈنگ مریک ہرانا سوب آن الس مشکل آتون مون ایتک۔ الس نا مالی حالیت مہالوآن بھاز زیات خراب مسنے ہنداسوب آن بجلی نا بھلا بل آتا ادائیگی اوفتا وس انا ہیت اس متنے، چیئرمین قائمہ کمیٹی مستی پارے کہ اڑزان سولر انرجی ملک انا اُرائی و کمرشل صارف ہڑتوم آتیکن نعمت اسے آن کم مفک، بھلا بھلا صنعت آتا بجلی نا بل ہنداخہ زیات مریک کہ اوفتا ادائیگی اوفتا وس آن پیش مریک، داڑآن پیدواری خڑچ زہمی مریک و تیار کروک مصنوعات جہانی منڈی تیٹی مسابقت نا قابل سلپک، چین نا شریداری اٹ مچ آملک آن توانائی نا تنکی نا مون ءِ توننگ اٹ کمک رسینگک وملک شونداری نا کنڈآ کاہک۔
