اسلام آباد۔ 02 اپریل (اے پی پی) چیف جسٹس آف پاکستان جسٹس قاضی فائز عیسیٰ نا کماشی ٹی سپریم کورٹ نا ہفت باسکی لارجر بنچ (پگہ) چارشنبے 3 اپریل 2024 ء آ عدلیہ ٹی مبینہ مداخلت نا باندات آ اسلام آباد ہائی کورٹ نا 6 جج آتا کنڈآن نوشتہ کروک آ چٹھی آ از خود نوٹس کیس انا سماعت ءِ کیک۔ لارجر بنچ اٹی جسٹس سید منصور علی شاہ ، جسٹس یحییٰ آفریدی، جسٹس جمال خان مندوخیل، جسٹس اطہرمن اللہ ، جسٹس مسرت ہلالی و جسٹس نعیم اختراوغان اوار ءُ۔ یات سلے کہ 26 مارچ 2024 ء آ اسلام آباد ہائی کورٹ نا 6 جج آتا کنڈآن سپریم جوڈیشل کونسل نا باسک آتے اسہ چٹھی اس نوشتہ کننگاسس، ہراٹی مبینہ وڑاٹ جج آتا رشتہ دار آتا برمتہ، بیدادی و ہنکین آتیٹی اودیم چاروکی نا کمک اٹ زور شاغنگ نا کوشست آتا دوبہ بیٹ کننگاسس۔ دا چٹھی ءِ اسلام آباد ہائی کورٹ نا جج جسٹس محسن اخترکیانی، جسٹس طارق محمود جہانگیری، جسٹس بابر ستار، جسٹس سردار اعجاز اسحاق خان، جسٹس ارباب محمد طاہر و جسٹس ثمن رفعت امتیاز نا دستخط آتے اٹ نوشتہ کننگا۔ چٹھی ٹی نوشتہ مبینہ دوبہ دار آتیا سپریم کورٹ ازخود نوٹس ہلسا سماعت نافیصلہ ءِ کرینے۔
