گلگت بلتستان نا مخلوق نا شونداری، اوفتے جان جوڑی و تعلیم نا آسرتی تا فراوانی حکومت نا اولیت ءِ، وزیراعظم شہباز شریف

اسلام آباد۔ 02 اپریل (اے پی پی) وزیراعظم محمد شہباز شریف پارینے کہ گلگت بلتستان نا مخلوق نا شونداری، اوفتے جان جوڑی و تعلیم نا آسراتی تا فراوانی حکومت نا اولیت ءِ۔ وزیراعظم آفس نا میڈیا ونگ آن جاری بیان نا رداٹ سے شنبے آ وزیراعظم محمد شہباز شریف وزیراعلیٰ گلگت بلتستان گلبر خان اوڑدہی کرے۔ داوخت  آ وزیر کانود و انصاف اعظم نذیر تارڑ، وزیر اقتصادی امور احد خان چیمہ و تعلقدار بڑزکو کمامدارآک ہم ساڑی ئسر۔ دیوان اٹی گلگت بلتستان اٹی تعلیم، جان جوڑی و سیل و سوات نا بشخ انا شونداری نا بابت سرجمی اٹ گپ وتران مس، دیوان ءِ گلگت بلتستان اٹی بنجائی حکومت نا کنڈآن عطاآباد و ہارپوٹی پن بجلی نا اِرا ڈٹ آتیا برجاکاریم ناپیش رفت نا بارواٹی معلومدار کننگا۔ دیوان ءِ پاننگاکہ دا ڈٹ آتا پوروی آن گلگت بلتستان اٹی بجلی نا بے سلنگ آن فراوانی ءِ پک کننگ مریک۔ وزیراعظم ءِ پاننگاکہ نلتر ایکسپریس وے انا تفنگ ناکاریم پورو مسنے ہرا علاقہ نا شونداری و شونہالی ٹی اہم کڑد اس ادا کیک۔ وزیراعظم گلگت بلتستان اٹی سیل و سوات نا شونداری و شمسی توانائی نا ڈٹ آتا بابت لائحہ عمل اس شین ترسا پیش کننگ نا پارت کرے۔ وزیراعظم گلگت بلتستانءِ مون تروک ویل آتا ایسری نا بابت  کمیٹی اس جوڑ کرساپارت کرے کہ کمیٹی گلگت بلتستان ءِ مون تروک غٹ ویل آتیا سلابت آن پد تینا سلاہ سوج آتے پیش کے ، گلگت بلتستان نا مخلوق نا شونداری، اوفتے جان جوڑی و تعلیم نا آسراتی نا فراوانی حکومت نا اولیت ءِ۔ وزیراعظم پارے کہ گلگت بلتستان اٹی نیزگار و نادار اُراتیان تعلق تخوک آ مار ومسن تیکن دانش اسکول جوڑ کننگ اُن۔ دانش اسکول چناتے جہانی آب انا بڑزکو تعلیم تون اوار اوار ہنکین نا آسراتی ہم فراوان کیک۔ وزیراعظم پارت کرے کہ گلگت بلتستان اٹ سیل و سوات نا گیشتر کچ آن پبی فائدہ ہرفنگ کن سلاہ و سوج مرتب کرسا پیش کننگے و گلگت بلتستان نا ہرمسٹ آ ڈویژن تیٹی دانش اسکول جوڑ کننگے۔ وزیراعظم گلگت بلتستان اٹی عطاآباد و ہارپوپن بجلی ڈٹ انا پوروی آ کاریم نا رفتار ءِ ترند کننگ نا پارت کرسا پارےکہ گلگت بلتستان اٹی شمسی توانائی نا ڈٹ آتا بابت لائحہ عمل اس مرتب کرسا پیش کننگے۔