اسلام آباد۔ 15جون (اے پی پی) وزیراعظم محمد نواز شریف پارینے کہ او ٹکا ٹکا نا حساب ئِ تسنے ، ننے آ سرکاری خزانہ نا نغڑدنگ یا کرپشن نا دوبہ اف بلکن شریف خاہوت نا نجی و جندی کاروبار و معاملہ غاتے الجھائفنگ و تالان کننگ انگ ئِ، ملک اٹی شریف خاہوت آن بیدس ہچ ئُ دُن ئُ خاہوت اس اف ہرانا مسہ نسل آتا داوڑبے رحمانہ احتساب مروئے، نئے تو مہالو ننا دامن آ کرپشن نا داغ اس خننگاسس نئے داسہ داوڑ مریک۔مخالف آک اخس کہ خواہر دوبہ خلیر، جتن کیر یا چمب ، او بے سہب و نامراد مریرہ، بروک آ سال 20 کروڑ الس نا بھلا عدالت و بھلا جے آئی ٹی لگنگ والا ئِ ہرا 2013ءآن ہم زیات جوش و جوزہ اتون ننا حق اٹی فیصلہ کیک۔ آئین الس نا حکمرانی نا پن ئِ ، جمہوریت الس نا فیصلہ غاتا شرف نا پن ئِ ، الس نا فیصلہ غاتے روندسا مخصوص ایجنڈا چلیفوک آ فیکٹریک بندمتوس تو آئین و جمہوریت ہی آخا خدانخواستہ ملک انا سلامتی ہم خلیس اٹی تمک۔ ملک چمب و تماشہ غاتا بھلو قیمت اس ادا کرینے، وخت بسنے کہ حق و سچ انا علم حقی وڑاٹ بڑز مرے، داسہ نن تاریخ نا پہیہ ئِ پدی ہڑسیفپنہ ، ہمو زمانہ ہنا ہراتم ہرگڑا پردہ غاتا پداٹ ڈکنگارہ داسہ کٹھ پتلی نا گوازی گوازی کننگ مفک۔ پنچ شنبے نا دے داڑے پانامہ دستاویز آتا جاست وپاست کن سپریم کورٹ نا کنڈآن جوڑ کروک آ جے آئی ٹی نا مون آ پیش مننگ آن پد جوڈیشل اکیڈمی نا پیشن کم و ود مسہ گھنٹہ آن چاری صحافی تتون ہیت و گپ کرسا وزیراعظم پارے کہ او جے آئی ٹی نا مون آ تینا موقف ئِ پیش کرسا بسنے۔
