پاکستان  ءِ زرگزرانی لانگ مارچ نا گرج ءِ، ملک ءِ آخبتی وڑاٹ وام تے اٹ چلیفنگ مفک، احسن اقبال

اسلام آباد۔ 20 مارچ (اے پی پی) بنجائی وزیر ڈٹ بندی پروفیسر احسن اقبال پارینے کہ پاکستان ءِ داوخت آ زرگزرانی لانگ مارچ نا گرج ءِ، مستین اٹ بھسکاری نا کنڈآ دِکہ تننگ آن  ملک ءِ بھاز نسخان مس ، اپوزیشن پارلیمنٹ اٹ تولسا تینا مثبت کڑد ءِ ادا کے تانکہ ملک ءِ مون آ دننگ مرے۔ داخیال آتا درشانی ءِ او نجی ٹی وی نا پروگرام اسے ٹی گپ وتران کرسا کرے۔ وزیر ڈٹ بندی آئی ایم ایف تون برجامذاکرات ءِ است جم گوندا و پارے کہ ملک اٹی اسہ سیاسی جماعت اسے ہرا آئی ایم ایف نا دفتر نا پیشن مچی کرسا مذاکرات اٹ اڑاند شاغنگ نا کوشست کرے، دا زرگزرانی دہشت گردی نا بریبر ءِ۔ احسن اقبال نا مستی پاننگ ئس کہ ملک ءِ آخبتی وڑاٹ داسہ وام و امداد آتے اٹ چلیفنگ مفک ننے داسہ تینا پیدواری لائخی ءِ  ودفوئی مریک وخت اس کہ ملک اٹی ایکسپورٹ ایمرجنسی خلنگ نا گرج ءِ۔ یات سلے کہ تدوک آ سال وزارت ڈٹ بندی 5 ایز فریم ورک اس جوڑ کریسس ہراٹی ایکسپورٹ، انرجی، ایکویٹی،ای۔پاکستان و انوائرمنٹ اوار ءُ۔ 5 ایز فریم ورک آ عملدرآمد کن وزارت ڈٹ بندی اسہ جوان ءُ ڈٹ اس تیار کرینے و دا بابت غٹ وزارت آتیان سلاہ ہم ہلنگ انگ  ءِ۔