بلوچستان اٹی جان جوڑی نا آب اٹ و پت انا قابل آسراتی تا فراوانی کن گام گیج آتے گچین کروئی مریک، سیکرٹری جا ن جوڑی عبداللہ خان

کوئٹہ۔ 19 مارچ (اے پی پی) سیکرٹری جا ن جوڑی عبداللہ خان پارینے کہ وزیراعلیٰ بلوچستان میر سرفراز بگٹی نا ویژن نا رداٹ بلوچستان اٹی جان جوڑی نا آب اٹ و پت انا قابل آسراتی تا فراوانی کن گام گیج آتے گچین کروئی مریک۔ بلوچستان انسٹیٹیوٹ آف کارڈیوویسکولرڈیزیز 200 کٹ آتیا تالان مریک۔ صوبائی دارالحکومت نا دا مرکزی ہسپتال اٹی الس ءِ است انا ہلہلہ ئی طبی سروس آتا رداٹ مون تروک ویل و مشکل آتا ازالہ ممکن مننگ کے، محکمہ جان جوڑی بلوچستان اٹی اصلاحات نا کمک اٹ گچین طبی سروس آتا فراوانی کن گام گیج برجاءِ ۔ داخیال آتا درشانی ءِ او سے شنبے نادے آ کماشی ٹی بلوچستان انسٹیٹیوٹ آف کارڈیوویسکو لرڈیزیز نا جوڑ کننگ کن دیوان اس اڈ ہلک۔ دیوان اٹی سروک شعبہ امراض قلب پروفیسر ڈاکٹر جلال الدین، ایڈیشنل سیکرٹری جان جوڑی عارف خان، ایڈیشنل سیکرٹری جان  جوڑی عبدالحمید زہری، چیف پی اینڈ ڈی ہیلتھ سیکشن مرضیہ، اسسٹنٹ  پروفیسر کارڈیک سرجری ڈاکٹر عصمت اچکزئی ، ڈویژنل ڈائریکٹر کوئٹہ ڈاکٹر لبنی خلیل، ڈائریکٹر ایڈمن بلوچستان ہیلتھ کارڈ ڈاکٹر احمد ولی، گورننس اسیپشلسٹ عبدالقادر ناصر و سینئر پروگرامر سوراب رفیق ئسک بشخ ہلکر۔ داوخت آ دیوان آن تران کرسا سیکرٹری جا ن جوڑی عبداللہ خان پارے کہ کوئٹہ ٹی بلوچستان انسٹیٹیوٹ آف کارڈیوویسکو ڈیزیز نا  جوڑ کننگ بھاز بھلو پیش رفت اسے ہرا نیشنل انسٹیٹیوٹ آف کارڈیو ویسکو لر ڈیزیز (NICVD)نا ماڈل ءِ مون آ تخسا جوڑ کننگک۔ اوپارے کہ صوبائی حکومت پوسکن وڑنا بلوچستان انسٹیٹیوٹ آف کارڈیوویسکولر ڈیزیز جوڑ کیک۔بلوچستان انسٹیٹیوٹ آف کارڈیوویسکو لر ڈیزیز ءِ صوبائی حکومت نا کنڈآن پوسکن آ طبی مشینری و ازباب ہم فراوان کننگک۔ سیکرٹری جا ن جوڑی مستی پارے کہ بلوچستان انسٹیٹیوٹ آف کارڈیو ویسکولر ڈیزیز 200 کٹ آتیا تالان مریک ہراڑےبلوچستان نا الس ءِ امراض قلب نا پوسکن آ درمان نا آسراتی فراوان مریک۔ الس ءِ درمان کن ایلو شار تیا ہنوئی تمپک و صوبہ نا بی ایچ کیوتے بنائی وڑاٹ سیٹلائٹ نا کمک اٹ انسٹی ٹیوٹ تون گنڈنگک۔ اوپارے کہ انسٹیٹیوٹ اٹی کارڈیالوجی کارڈیک سرجری الیکٹروفزیالوجی چناتا کارڈیالوجی ریڈیالوجی و پتھالوجی نا آسراتی دستیاب مریک۔