سردار اویس احمد خان لغاری ءِ وزارت توانائی نا قلمدان ءِ تننگ وزیراعظم نا اوڑآ پبی پت انا درشانی ءِ

اسلام آباد۔ 19 مارچ (اے پی پی) وزیراعظم محمد شہباز شریف بجلی نا بشخ اٹی اصلاحات، گردشی وام و لائن لاسز اٹی کمتی، بجلی دُزی نا توننگ، اڑزان بجلی نا دوئی کننگ، لوڈشیڈنگ  و اووربلنگ نا چٹفنگ تون اوار ملک اٹی توانائی نا ویل آتا آخبتی ایسری کن سردار اویس  احمد خان لغاری ءِ وزارت توانائی نا قلمدان ءِ ترسا اوڑآ پبی پت انا درشانی ءِ کرینے۔ 2002ء نا لس گچین کاری تیان پد اودے بنجائی وزیر انفارمیشن ٹیکنالوجی و ٹیلی مواصلات نا قلمدان ءِ تننگا۔ بطور بنجائی وزیر آئی ٹی و ٹیلی کام اونا دور اٹی ٹیلی کام نا بشخ اٹی ڈی ریگولیشن ن ءِ مون آدننگ ملا و پی ٹی سی ایل نا سرسہب نجکاری ءِ کننگا۔ ٹیلی کام سیکٹر اٹی مسابقت نا فضابناکرے ہرانا صارف آتے بھاز فائدہ مس۔ اونا وزارت نا مد اٹی پاکستان اٹی آئی ٹی و ٹیلی کام نا بشخ اٹی چندی پوسکن آ ڈٹ آتا بناءِ کننگا۔ مچ آملک اٹی ٹیلی مواصلات نا آسراتی تے لس بندغ اسکان سرکننگ اٹ اونانمان کڑد اس ئس۔ داکان بیدس آئی ٹی نا برآمد آتیٹی ہم ریکارڈ ودکی مس۔ سردار اویس احمد خان لغاری نا سرسہب شعبہ جاتی اصلاحات ءِ درستی راستی کرفنگ نا بابت اہم ءُ پن اسے۔ سردار اویس احمد لغاری 2013ء آن 2017 ء اسکان قومی اسمبلی نا قائمہ کمیٹی خارجہ امور نا چیئرمین ہم رہینگا و تینا مد اٹی او پاکستان نا چندی ملک آتون تعلقداری تے گچین کننگ کن قائمہ کمیٹی نا سلاہ و سوج آتا تیاری ٹی قائدانہ کڑد ادا کرے۔ سردار اویس احمد خان لغاری مہالو ہم 2016ء آن 2018 ء نا نیام اٹ اہ سال آن زیات وخت پاور ڈویژن نا بنجائی وزیر رہینگانے۔ تینا دا دور اٹی او صارف آتا آسراتی کن بجلی نا بشخ اٹی نیٹ میٹرنگ ءِ درستی راستی کرفے  اوکان پد صارف آتا کنڈآن شمسی توانائی آن اڑزآن بجلی تینٹ جوڑ کننگ و کاریم اٹ اتنگ آن زیات بجلی حکومت ءِ بہاکننگ نا عمل ترندی اٹ بناکرے۔ تینا ہندا دور اٹی او صارف آتا متکن آ ویل آتا ایسری کن عملی گام گیج کرے۔ اووربلنگ نا توننگ کن کانود سازی کرفے، اوبجلی نا فراوانی و بشخنگ نا نظام ءِ گچین کننگ کن زرکاری ءِ ودفے و الس ءِ اڑزان بجلی نا فراوانی کن ملکی ذریعہ غا سیبو آن بیدس اڑزان بجلی پیدوار کن بولی نا مسابقتی وڑوڈول ءِ درستی راستی کرفے۔