ٹیکسٹائل مصنوعات آتا برآمد آتیٹی برجامالی سال نا اولیکو 8 تُو اٹی سالانہ بنداوتیا 0.7 درسد نا کمتی، 19.2 درسد نا ودکی ریکارڈ

اسلام آباد۔ 18 مارچ (اے پی پی) ٹیکسٹائل مصنوعات نا برآمد آتیٹی برجامالی سال نا اولیکو 8 تُو اٹی سالانہ بنداوتیا 0.7 درسد نا کمتی وخت اس کہ فروری ٹی سالانہ بنداوتیا 19.2 درسد نا ودکی ریکارڈ کننگانے۔ پاکستان بیورو شماریات نا حساب وکتاب نا رداٹ برجامالی سال نا اولیکو 8 تُو اٹی ٹیکسٹائل مصنوعات نا برآمد آتیان ملک ءِ 11.14 ارب ڈالر نا زرمبادلہ دوئی مس ہرا تدوک آ مالی سال نا ہندا مد انا مقابلہ ٹی 0.7 درسد کم ءُ۔ تدوک آمالی سال نا ہندا مد انا مقابلہ ٹی ٹیکسٹائل مصنوعات آتا برآمد آتیان ملک ءِ 11.21 ارب ڈالر نا زرمبادلہ دوئی مسوسس۔ فروری ٹی ٹیکسٹائل مصنوعات آتا برآمد آتا کچ 1.407 ارب ڈالر ریکارڈ کننگا ہرا تدوک آ سال فروری نا مقابلہ ٹی 19.2 درسد زیات ءُ۔ تدوک آ سال فروری ٹی ٹیکسٹائل مصنوعات آتا برآمد آتا کچ 1.180 ارب ڈالر ریکارڈ کننگا۔ جنوری نا مقابلہ ٹی فروری ٹی ٹیکسٹائل مصنوعات آتا برآمد ماہانہ بنداوتیا 3.3 درسد نا کمتی مسنے۔ جنوری ٹی 1.455 ارب ڈالر نا مالیت نا ٹیکسٹائل مصنوعات آتا برآمد ریکارڈ کننگا ہرا فروری ٹی کم مرسا 1.40 ارب ڈالر مسر۔