پاکستان موسمیاتی خطرہ غاتا غٹ آن زیات گواچی دنیا ٹی پنچ میکو ملک ءِ، وزیراعظم محمد شہباز شریف نا دود آن تران

اسلام آباد۔ 15 مارچ (اے پی پی) وزیراعظم محمد شہباز شریف ملک ءِ چاگڑدی خطرہ غاتیان بچفنگ کن مچ آقوم ءِ شجرکاری مہم اٹی پبی بشخ ہلنگ نا اپیل کرساپارینے کہ پاکستان دنیا ٹی موسمیاتی خطرہ غاتا غٹ آن زیات گواچی پنچ میکو ملک ءِ، موسمیاتی بدلی نا خطرہ غاتون مون تننگ کن آگاہی المی ءِ، ملک اٹی جنگلات آتا رقبہ بیرہ 5 درسد ءِ، برجاسال نیال خلنگ نا ہدف ءِ دوگنا کننگک۔ داخیا ل آتا درشانی ءِاو وزیراعظم ہاؤس اٹی ہتم نا ملک گیر شجرکاری مہم نا بناء نا دود آن تران کرسا کرے۔ داوخت آ وزیرمملکت انفارمیشن ٹیکنالوجی شزہ فاطمہ خواجہ ہم ساڑی ئس۔ وزیراعظم محمد شہباز شریف پارے کہ او نیال خلسا مچ آملک اٹی ہتم نا شجرکاری نا بناءِ کرینے، ننا تدوک آ حکومت  مچ آ ملک اٹی درخت خلنگ نا ہرا ہدف ءِ مقررکریسس، برجاسال خلوک آ نیال آتا کچ ءِ دوگنا کینہ۔ اونا پاننگ ئس کہ ملک انا جم رقبہ نا رداٹ جنگل آتا کچ بیرہ 5 درسد ءِ، جہانی چاگڑدی رسک انڈیکس رپورٹ نا رداٹ پاکستان موسمیاتی خطرہ غاتا غٹ آن زیات گواچی دنیا ٹی پنچ میکوملک ءِ۔ اوپارے کہ 1999 آن 2018 ٹی موسمیاتی بدلی تا سوب آن 10 ہزار نہادی جان زیان مسر و ننا زرگزران ءِ ارب آ ڈالر نا نسخان مس، ہندا سوب آن تعلیمی ادارہ غاتیٹی ہم دا خطرہ غان آگاہی فراوان کننگ المی ءِ، و شجرکاری مہم ءِ مچ آ ملک اٹی تالان کننگ کن غٹ تر کوشست آتے کننگے۔ وزیراعظم پارے کہ مچ آ قوم ءِ مرے کہ ملک ءِ چاگڑدی خطرہ غاتیان بچفنگ و جان جوڑ چاگڑد اس تننگ کن شجرکاری نا مہم اتی زیات آن زیات بشخ ہلے تانکہ پاکستان ہروڑنا چاگڑدی کچٹی و چاگڑدی خطرہ غاتیان رکھ سلے۔ داکان مست وزیراعظم پی ایم ہاؤس اٹی نیال اس خلسا ہتم نا ملک گیر شجرکاری مہم نا بناءِ کرے۔ یات سلے کہ برجاسال 2024 اٹی ہتم نا شجرکاری مہم اٹی مچ آملک اٹی جم وڑاٹ 5 کروڑ 43 لکھ 80 ہزار نیال خلنگک۔