بنجائی سیکرٹری ہوابازی سیف انجم تون ایتھوپیا نا سفیر جمال بیکر عبداللہ نا اوڑدہی

اسلام آباد۔ 14 مارچ (اے پی پی) بنجائی سیکرٹری ہوابازی سیف انجم تون پاکستان اٹی  ایتھوپیا نا سفیر جمال بیکر عبداللہ اوڑدہی کرے  و ایوی ایشن سیکٹر اٹی پاکستان تون آخبت اٹ کمکاری نا ممکنہ بشخ آتیا گپ وتران کرے۔ ایتھوپیا نا سفارت خانہ غان پنچ شنبے نادے آجاری بیان نا رداٹ اوڑدہی ٹی ہڑتوم آک ہوابازی نا بشخ اٹی علم انا ہل و تس و ٹیکنالوجی نا  گدریفنگ کن ہڑتوم آکنڈآتا کمکاری تون اوار تین پہ تینی است خواہی نا امور آ سرجمی اٹ گپ وتران کریر۔ داوخت آ سفیر جمال بیکر عبداللہ کراچی ٹی ایتھوپیئن ایئرلائنز نا آپریشن نا بناآ حکومت پاکستان نا کنڈآن تروک آ آسراتی تیا منت واری ءِ ہرفے۔ سفیر جمال بیکر عبداللہ سیکرٹری ہوابازی ءِ ایتھوپیا نا ایئرلائنز نا کنڈآن پاکستان نا ’’لک افریقہ و انگیج افریقہ‘‘ پالیسی نا گچین نفاذ اٹی اہم کڑد انا بارواٹی معلومدار کرے  ہرانا مسخت پاکستان و افریقی ملک آتا نیام اٹ واپاری تعلقداری تون اوار اوار حکومتی ، الس تون الس و کاروبار نا نیام اٹ تعلقداری ءِ سوگو کننگ ءِ۔ اوپاکستانی الس اٹ ایتھوپین ایئرلائنز نا ودوک آ مقبولیت  ءِ ہم مون آتخا ہرا دنیا نا بھلا ایئرلائنز آن اسٹ ءِ و دانا کنڈآن پیش کروک خذمت آتا ستاءِ کننگ انگ  ءِ۔ بنجائی سیکرٹری ہوابازی سیف انجم  افریقہ ءِ پاکستان نا خڑک اتنگ اٹ ایتھوپیئن ایئرلائنز نا اہم کڑد انا اعتراف ءِ کرے و سفیر ءِ ایوی ایشن نا بشخ اٹی ہڑتوم آکنڈآتا کمکاری ءِ مون آدننگ اٹ تینا ادارہ نامخ تفی نا باوری کرفے۔