وخت و وسیلہ غاتا زیان ءِ توننگ کن زوت آن زوت ڈیجیٹلائزیشن ءِ پک کننگک، احسن اقبال

اسلام آباد۔ 14مارچ (اے پی پی) بنجائی وزیر ڈٹ بندی، شونداری ، اصلاحات و خصوصی گام گیج احسن اقبال پارینے کہ زرگزرانی و شونداری اولیت آتا سہی تعین  ڈٹ بندی کمیشن نا اہم انگا زمواری ءِ ، گچین لائخی و آزموند ہ نا حامل بندغ آتا شونداری عمل نا ڈٹ بندی ٹی شریداری المی ءِ، وخت کم ءِ و چیلنج آک بے شمار، ننے نظام نا پیچیدگی تے بدل کرسا تینا پنجر ءِ فعال کننگ نا گرج ءِ، وخت و انسانی و مالی وسیلہ غاتا زیان ءِ توننگ کن زوت آن زوت ڈیجیٹلائزیشن ءِ پک کننگک، وزارت آن جاری بیان نا رداٹ داخیال آتا درشانی ءِ او وزارت ڈٹ بندی نا سینئر آفیسر آتیان تران کرسا کرے۔ احسن اقبال پارے کہ ملک ءِ مون تروک چیلنج آتیان عہدہ براہ مننگ کن زرگزرانی و شونداری ولیت آتا سہی تعین ڈٹ بندی کمیشن نا اہم زمواری ءِ۔ وزیراعظم پاکستان نا وژن ءِ کہ قومی ادارہ غاتیٹی گچین دماغ و لائخ آ بندغ آتے اتس ملکی ادارہ غاتا کاریم نا کچ اٹی گچینی اتنگے۔ وزارت ڈٹ بندی و ڈٹ بندی کمیشن اٹی آفیسر آتا کاریم نا کچ اٹی گچینی اتنگ کن حکمت عملی اس جوڑ کننگے۔ اوپارے کہ صوبہ و ایلو وزارت آتیان شونداری ڈٹ آتا پی سی ون نا جاچءِ ہلنگ کن چاہندار آتا شریداری نا دنگ ءِ ودفنگ کن میکنزم اس طے کننگے۔ ساڑی و آخبت نا چیلنج آتون مون تننگ کن نجی بشخ، اوورسیز، اکیڈیمیا و انڈسٹری آن پروفیشنل و چاہندار آتے سرکاری بشخ اٹی اتنگ کن حکمت عملی اس جوڑ کننگے ، وخت کم ءِ و چیلنج آک بے شمار، ننے نظام نا پیچیدگی تے بدل کرسا تینا پنجر ءِ فعال کننگ نا گرج ءِ۔