بھا زانگا ملک آک اے آئی ٹی زیات زرکاری نابناءِ کرینو، پاکستان ءِ داٹی تینا پبی کڑد ءِ ادا کروئی مریک، بنجائی وزیر ڈٹ بندی احسن اقبال

اسلام آباد۔ 13 مارچ (اے پی پی) بنجائی وزیر ڈٹ بندی شونداری و خصوصی گام گیج پروفیسر احسن اقبال چارشنبے نادے آ نیشنل یونیورسٹی آف سائنس اینڈ ٹیکنالوجی (نسٹ) نانیشنل سینٹر آف آرٹیفیشل انٹیلی جنس (اے آئی) نادورہ ءِ کرے و اونا پین چار سینٹر آتیٹی کاریم تا پیش رفت نا جاچ ءِ ہلک۔ دا سینٹر ز روبوٹکس، سائبر سیکورٹی ، بگ ڈیٹا و کلاؤڈ کمپیوٹنگ نا بشخ آتیٹی کاریم کننگ ءُ، ہرافتا بنداو ءِ احسن اقبال تخاسس۔ وزارت ڈٹ بندی آن جاری بیان نار داٹ دورہ نا وخت آ ریکٹرنسٹ انجینئر جاوید محمود بخاری و ایلوکمامدارآک بنجائی وزیر ءِ بخیرکریر وخت اس کہ بنجائی وزیر ءِ سینٹر آتا بارواٹی داتم اسکان نا پیش رفت نا بارواٹی اسہ جوان ءُ حوال اس ہم تننگا۔ داوخت آ احسن اقبال پارے کہ ایچ ای سی نا سہی راہشونی اتون، دا سینٹرآک اقتصادی شونداری کن مصنوعات آتا کمرشلائزیشن و ڈیجیٹل برآمد آتا کمک اٹ ملکی زرگزران ءِ شون تننگ کیرہ۔ پوسکن آ ٹیکنالوجی  جہانی کہول آ زرگزران تیٹی تمبہ نا حیثیت تخک ودنیا نا بھاز انگا ملک آک تینا قومی بدلی کن آرٹیفیشل انٹیلی جنس اٹ زیات زرکاری نا بناءِ کرینو و پاکستان ءِ داٹی تینا پبی کڑد ءِ ادا کروئی مریک۔ داوخت آنیشنل سینٹر آف آرٹیفیشل انٹیلی جنس ناچیئرمین پروفیسر ڈاکٹر ایاز تینا سینٹر نا بابت داتم اسکان نا پیش رفت  آن بنجائی وزیر ءِ معلومدار کرے و ملک انا تکنیکی منظرنامہ نا ٹہیفنگ اٹ سینٹر نا اہم کڑد آتے ہم مون آتخا۔