کوئٹہ۔ 12 مارچ (اے پی پی) قطر چیرٹی نا کنڈآن کوئٹہ ٹی روچہ مبارک نا بننگ نا وخت آ 300 آن زیات حقدار، نیزگار بندغ و اوغان مہاجرآتیٹی راشن بشخنگا ۔ داوخت آ قطر چیریٹی پروجیکٹ نا منیجر اعجاز الرحمان خلیل، پروجیکٹ آفیسر فہد علی کیانی، مانیٹرنگ افسر ندا بتول، ڈپٹی ڈائریکٹر کمشنر اوغان مہاجر میر احمد ریکی ئسک ہم ساڑی ئسر، ایوب اسٹیڈیم اٹی حقدار ونیزگار بندغ آتیٹی راشن بشخنگ نا وخت آ اڈ ہلوک دود آن تران کرسا پروجیکٹ افیسر فہد علی کیانی پارےکہ قطر چیریٹی نا کنڈآن بلوچستان نا 6 ضلع کوئٹہ، پشین، قلعہ سیف اللہ، لورالائی، چاگی و چمن اٹی 1800 خاہوت آتیٹی مفت راشن بشخنگ انگ ءِ کوئٹہ ٹی اینو 300 خاہوت آتیٹی راشن بشخنگانے ہرافتےٹی چڑیا5 کلو، سی 5 کلو، اِلار 2 کلو، نت 15 کلو، بورہ 5 کلو، برنج 5کلو، بے پیکٹ 2 دانہ، چاہ انا پتی 700 گرام اوار ءِ۔ اوپارےکہ دا کبینی نا دور اٹی نیزگار بندغ آتا گزربسر بھاز مشکل مسنے ہندا سوب آن دا بابرکت تُو اٹی سخی تے مرے کہ او تینا دامون ایمون نیزگار و حقدار بندغ آتا خاص خیال ءِ تخر۔ اوپارے کہ قطر چیریٹی نا کنڈآن نیزگار و حقدار بندغ آتے باعزت وڑاٹ راشن فراوان کننگ انگ ءِ تانکہ کس اسے نا عزت نفس مجروح مننگ کپ۔ اوپارے کہ قطر چیریٹی ہر سال آنبار داسال آ ہم بلوچستان نا 6 ضلع غاتیٹی 1800 خاہوت آتا لڑ اس تیار کرینے ہرافتے مفت راشن فراوان کننگ انگ ءِ۔
