خاران۔ 12مارچ (اے پی پی) پاکستان پیپلزپارٹی نا مرکزی راہشون مسکوہی گورنر بلوچستان مسکوہی بنجائی وزیر جنرل ریٹائرڈ عبدالقادر بلوچ پاکستان نا پوسکن گچین مروک صدر آصف علی زرداری نا سوغندی آن پد قوم ءِ مبارکبادی ترسا تینا جاری کروک بیان اٹی پارے کہ بلوچستان نا غیرتی الس ءِ بھاز بھاز موارک مرے، جمہوریت نا علمبردار شون پسند صدرآصف علی زرداری اسہ وار ولدا صدارت نا عہدہ ءِ سنبھالا، پاکستان پیپلزپارٹی ہراتم کہ اقتدار اٹی بسنے بلوچستان نا الس نا ترجمانی ءِ کرسا حقدار ناحق و حق ءِ اونا درگہ غا سرکننگ اٹ اہم رول اس ادا کرینے، بیان اٹی پاننگا تدوک آ دور تیٹی اگہ ہُننگے صدر آصف علی زرداری اقتدار اٹی غٹ آن مست ہژدہ می ترمیم نا بنداو ءِ تخسا صوبہ غاتے وتواجہ جوڑ کرے، آغاز حقوق بلوچستان نا کمک اٹ چندی بے روزگار آتے روزگار ترفے، بیان اٹی پاننگاکہ بلوچستان داوخت آ چندی ویل آتا گواچی ءِ ، جان جوڑی و تعلیم نا بشخ مفننگ نا بریبر ءُ ساڑی آ نوکاپ و پِر تیان چندی ضلع غاک زہمی مرسا بے یارومددگار نان شبینہ کن محتاج ءُ ۔ بے روزگاری ترندی آٹی ءِ، ورناچین بے روزگاری نا سو ب آن احساس کمتری نا گواچی مسنو ، باڈر تون گنڈوک علاقہ غاک ہم چندی ویل آتا گواچی ءُ۔ انشاء اللہ صدر آصف علی زرداری و پاکستان پیپلزپارٹی نا پوسکن گچین مروک آ وزیراعلیٰ بلوچستان میر سرفراز بگٹی نئے بیرہ بلوچستان آن محرومیت ءِ چٹفرہ بلکن تعلیم و جان جوڑی ءِ فعال کرسا بلوچستان نا ورناتے روزگار اس ترفسا بارڈر ءِ ملنگ سمندر ءِ ٹرالر مافیہ غان ساف کرسا بلوچستان اٹی میگا پروجیکٹ اتسا شونداری نا کسر آ دیرہ۔
