اسلام آباد۔ 12 مارچ (اے پی پی) وزیراعظم محمد شہباز شریف ملکی آئی ٹی برآمد آتے ودفنگ کن جوان ءُ روڈ میپ اس جوڑ کننگ نا پارت کرساپارینے کہ ملک اٹی ارب آ ڈالر نا آئی ٹی برآمد آتا کچ آن پبی فائدہ ہرفنگ کن گام گیج ہرفنہ، ورناتے آئی ٹی نا بشخ اٹی تعلیم و کسب و اسٹارٹ اپس ءِ درکار آسراتی فراوان کننگک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او سے شنبے نادے آ تینا کماشی ٹی آئی ٹی نا بشخ انا بابت بڑزکو کہولی جاچ دیوان اٹی گپ وتران کرساکرے۔ دیوان اٹی بنجائی وزیر خزانہ محمد اورنگزیب ، بنجائی وزیر اقتصادی امور و اسٹیبلشمنٹ احدخان چیمہ، وزیر مملکت انفارمیشن ٹیکنالوجی شزہ فاطمہ خواجہ، گورنر اسٹیٹ بینک جمیل احمد، شہزاد سلیم و تعلقدار بڑزکو کمامدارآک بشخ ہلکر۔ وزیراعظم پارے کہ ملک اٹی ارب آ ڈالر نا آئی ٹی برآمد آتا کچ آن پبی فائدہ ہرفنگ کن گام گیج کینہ۔ ورناتے آئی ٹی نا بشخ آتیٹی تعلیم و کسب و اسٹارٹ اپس ءِ درکار آسراتی فراوان کینہ۔ تدوک آ دور حکومت اٹی آئی ٹی نا صنعت کن ہراڈٹ آتا بناءِ کرین اوفتا جوان ءُ بھرم اس مون آ بننگ ءِ۔ اسٹارٹ اپس، فری لانسرز و آئی ٹی کمپنی تا بنکاری نا بابت غٹ ویل آتے ایسر کرین۔ اوپارے کہ برجاسال آئی ٹی برآمد آتا گمانی کچ 3 ارب ڈالر آن زیات ءِ ہراستاکڑزک ولے ننے داٹی ودکی کننگ نا ءِ ۔ وزیراعظم پارت کرے کہ اسپیشل ٹیکنالوجی زون تا بابت ہم اسہ جوان ءُ رپورٹ اس مرتب کرسا پیش کننگے۔ پاکستان نا آئی ٹی نا بشخ ءِ جہانی آب آ اتنگ کن جوان خواری کروئی مریک۔ دیوان ءِ ملک اٹی آئی ٹی بشخ انا بابت سرجمی اٹ معلومدار کننگا۔ دیوان اٹی وزیراعظم ءِ جون 2023 اٹی وزیراعظم نا کنڈآن تروک آ 5 ارب نا آئی ٹی بشخ انا برآمد آتیٹی تدوک آ سال انا مقابلہ برجاسال انا اولیکو 7 تُو اٹی 13 درسد ودکی مسنے۔ دیوان ءِ مستی پاننگاکہ ڈیجی۔ اسکلز پروگرام نا رداٹ داوخت آ 17 بیچز اٹی کم وود 40 لکھ طالب علم آتے آئی ٹی نا ٹریننگ تننگانے ہراٹی 28 درسد کچ زالبول آتا ءِ۔ دیوان ءِ مستی پاننگاکہ فری لانسرزآتا کچ انا بابت پاکستان دنیا نا ارٹ میکو بھلا ملک ءِ۔ پاکستان تینا آئی ٹی مصنوعات آتے 170 ملک آتے برآمد کیک۔ دیوان ءِ پاننگاکہ تدوک آ سال، پاکستانی اسٹارٹ اپس اٹی 400 ملین ڈالر نا زرکاری مس۔ وزیراعظم پارت کرے کہ پاکستان نا آئی ٹی بشخ اٹی زرکاری و برآمد آتیٹی ودکی کن غٹ المی کانودی و پالیسی گام گیج کننگے۔ وزیراعظم پارے کہ آئی ٹی سیکٹر نا کچ آن پبی فائدہ ہرفنگ کن ورناتے کسبی وتکنیکی تربیت نا ڈٹ آتیا کاریم ءِ ترند کننگے۔ دیوان ءِ آئی ٹی ، ای روزگار، اسٹارٹ اپس، سائبر سیکورٹی ، ٹیلی کام سیکٹر و ملک اٹی5۔ جی نا بناءِ کننگ آ پیش رفت و گام گیج آتیان معلومدار کننگا۔ وزیراعظم تعلقدار کمامدارآتے ملکی آئی ٹی برآمد آتیٹی ودکی کن اسہ پیدوار ءُ روڈ میپ اس جوڑ کرسا پیش کننگ نا پارت کرے۔
