کوئٹہ۔ 11 مارچ (اے پی پی)چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ روچہ مبارک نا بابر کت تُو اسہ دے انا مری آٹی ءِ کبینی تینا بے کچ کہول آ ٹی ءِ، ننا ملک اٹی روچہ مبارک اٹی کبینی ءِ کم کننگ نا جاگہ غا ودفنگک، بنجائی و صوبائی حکومت آتا زمواری ءِ کہ او بلوچستان نا الس ءِ کنوئی آ گڑاتا فراوانی ءِ پک کیر دُن تو بنجائی و صوبائی حکومت بلوچستان روچہ پیکج نا پڑو ءِ کرینو ولے دا پیکج گنج اس اف۔ داڑے جاری مروک اسہ بیان اسے ٹی سینیٹر محمد عبدالقادر پارے کہ حکومت بلوچستان نا زمواری ءِ کہ او مارکیٹ آتیٹی المی آ گڑاتا نرخ آتیا سخت نظر تخے تانکہ الس ءِ اڑزآن نرخ آتیا المی آ گڑاتا فراوانی ممکن مننگ کے، کوڑی کروک آ منافع خور آتے کانود نا دنگ اٹ اتسا سخت سزا تننگے تانکہ مفلوک الحال مخلوق اوفتا ستم و سفاکیت آن رکھ مننگ کے، بلوچستان رقبہ نا اعتبار اٹ ملک انا غٹ آن بھلا صوبہ ءِ اونا آبادی ہرجاگہ غا تالان ءِ ضلعی و تحصیل کہول آ انتظامیہ نا زمواری ءِ کہ حاجت مند آتسکان المی آ گڑاتا فراوانی ءِ پک کیر۔ اوپارےکہ تدوک آ دے تیٹی مروک آ ترند انگا پِرتا سوب آن بلوچستان بھاز بے وڑ زہمی مسنے دا پِر تا سوب آن صوبہ نا طول و عرض اٹی رہینگوک آ مخلوق نا بے کچ نسخان مسنے، حکومت زہمی تا بحالی کن اخہ فنڈ جتا کرینے او گنج اس افس فنڈ آتا فراوانی نسخان تتون مطابقت تخپک، بلوچستان حکومت و بنجائی حکومت ءِ مرے کہ فی الفور زہمی تے نسخان تا رداٹ فنڈ سرکیر تانکہ او وخت آ تینا ہنکین تا جوڑ جاڑ و دیکھ بھال ءِ کننگ کیر، ترند انگا پِر تیٹی ٹھپی مروک آتے سرکاری خڑچ آ آب اٹ درمان نا آسراتی تننگے۔ چیئرمین قائمہ کمیٹی پارے کہ بلوچستان حکومت و بنجائی حکومت تون اوار اوار مچ آ صوبہ نا سخی تے مرے کہ او تینا دا ایڑھ ایلم تا خذمت ءِ کیر روچہ مبارک اٹی تکلیف اٹی اختہ دا ایڑھ ایلم تا بحالی ننا غٹ انا اجتماعی زمواری ءِ حکومت و سخی تا خصوصی چکار آن مچ آ صوبہ نازہمی تا بحالی ہلہلہ ئی بنداوتیا مرے تانکہ مخلوق روچہ مبارک نا روچہ غاتا باملنگ و باتفنگ نا بست وبند ءِ کننگ کیر۔
