اسلام آباد۔ 11 مارچ (اے پی پی) متحدہ عرب امارات اٹی کاریم کروک آ پاکستانی تا زرراہی تس اٹی فروری ٹی سالانہ بنداو آ 19 درسد نمو ریکارڈ کننگا۔ اسٹیٹ بینک نا حساب و کتاب نا رداٹ فروری ٹی متحدہ عرب امارات اٹی کاریم کروک آ پاکستانیک 385 ملین ڈالر زرمبادلہ ملک آ گدریفیر ہرا تدوک آ سال فروری نا مقابلہ ٹی 19 درسد زیات ءُ، تدوک آ سال فروری ٹی متحدہ عرب امارات اٹی کاریم کروک آ پاکستانیک 324 ملین ڈالر زرمبادلہ ملک آ گدریفیسر۔ جنوری نا مقابلہ ٹی فروری ٹی یواے ای آن زرراہی تس اٹی ماہانہ بنداو آ 6 درسد کمتی ریکارڈ کننگا۔ جنوری ٹی یواے ای آن زر راہی تس نا کچ 408 ملین ڈالر ریکارڈ کننگا ہرا فروری ٹی کم مرسا 385 ملین ڈالر مسر۔ برجامالی سال انا اولیکو 8 تُو اٹی یواے ای ٹی کاریم کروک آ پاکستانیک جم وڑاٹ 3.12 ارب ڈالر زرمبادلہ ملک آ مون تسر ہرا تدوک آ مالی سال انا ہندا مد انا مقابلہ ٹی 3 درسد کم ءُ، تدوک آ مالی سال نا ہندا مد اٹی یواے ای ٹی کاریم کروک آ پاکستانیک 3.20 ارب ڈالر زرمبادلہ ملک آ گدریفیسر۔
