اسلام آباد۔ 10 مارچ (اے پی پی) وزیراعظم شہباز شریف روچہ ریلیف پیکج نا کچ ءِ 7 ءُ نیم ارب روپئی آن ودفسا 12 ءُ نیم ارب روپئی کننگ نا پارت کرینے۔ شنبے آ وزیراعظم آفس نا میڈیا ونگ آن جاری بیان نا رداٹ وزیراعظم روچہ ریلیف پیکج نا کچ ءِ ودفنگ آن بیدس اونا دنگ ءِ ہم پین ودفنگ نا پارت جاری کرے۔ یوٹیلیٹی اسٹورز و بے نظیر انکم سپورٹ پروگرام تون اوار اوار موبائل یونٹ آک ہم اڑزآن دام تیا کنوئی ءُ گڑا فراوان کیرہ۔ وزیراعظم پارت کرے کہ زیا ت آن زیات نیزگار، نادار و حقدار بندغ اسکان روچہ ریلیف پیکج ءِ سرکننگے۔ بنائی وڑاٹ 1200 موبائل پوائنٹس و 300 آخبتی پیکج ریلیف ہند جوڑ کننگ انگ ءِ۔اولیکو روچہ غان آخیریکو روچہ اسکان ریلیف پیکج نا رداٹ لس بازار آن کم نہاد آ گڑافراوان کننگک۔ متعین ہند آتیان بیدس ٹرک چندی علاقہ غاتیٹی نیزگار الس ءِ اڑزآن کنوئی آ گڑا سرکیرہ۔ ہند آتا تعین پوسکن آ ٹیکنالوجی، جی پی ایس ، نا کمک اٹ کننگک۔ موبائل ایپ نا کاریم اٹ اتنگ نا راہشونی کن خصوصی ویڈیو ہم جاری کننگک۔ ڈیجیٹل ٹیکنالوجی نا کمک اٹ چلینگوک آ ڈیش بورڈ تیار کننگ انگ ءِ تانکہ موبائل نُت انا بہانا چاروکی مننگ کے۔ موبائل یونٹ آتا اسٹ آن ایلو ہند اسکان گدریفنگ اٹی نت انا فراوانی نا عمل برجاسلک۔ موبائل و لائیو فوٹیج آن نت انا بشخنگ نا پدریسہ چاروکی ءِ کننگک۔ وزیراعظم شہباز شریف 7 مارچ 2024 آ ہفت ءُ نیم ارب روپئی نا سبسڈی آن روچہ ریلیف پیکج نا پڑو کریسس۔ 3 کروڑ 96 لکھ خاہوت آتے روچہ مبارک اٹی اڑزآن دام تیا کنوئی آ گڑا فراوان کننگک۔ بے نظیر انکم سپورٹ پروگرام نا رداٹ نت، برنج، دال، سی، بورہ ، شربت و پال مارکیٹ آن کم نہاد آ فراوان کننگک۔ روچہ ریلیف پیکج نا رداٹ حقدار بندغ آتے بازار آن 30 درسد کم نہاد آ کنوئی آ گڑاتا فراوانی کننگک۔ نت آ فی کلو 77 روپئی و سی آ 70 روپئی فی کلو سبسڈی تننگک۔
