کوئٹہ۔ 08 مارچ (اے پی پی)پاکستان پیپلزپارٹی کوئٹہ ڈویژن نا صدر خیرمحمد ترین پارینے کہ سپریم کورٹ شہید ذوالفقار علی بھٹو کیس انا صدارتی ریفرنس آ تاریخی فیصلہ اس ترسا بانی پیپلزپارٹی ءِ انصاف تس، داکیس اٹ شہید ذوالفقار علی بھٹو ءِ فیئر ٹرائل نا حق ملپننگ ناحقیقت اسکان سرمننگ اٹ سپریم کورٹ ءِ پنجاسال نا وخت لگا، وخت پک کرے کہ شہید ذوالفقار علی بھٹو ءِ تروک آ سزا ٹی انصاف نا خواست آتے پورو کننگتویسس۔ داڑےجاری مروک آ اسہ بیان اسے ٹی خیرمحمد ترین پارے کہ عدالت آن مروک آزیادتی ءِ سپریم کورٹ نا سہی کننگ اسہ مثبت ءُ پیش رفت اسے۔ اوپارے کہ ذوالفقار علی بھٹو شہید نا پاہونا برخلاف صدارتی ریفرنس اٹی سپریم کورٹ امنائی سلاہ تسنے کہ ذوالفقار علی بھٹو شہید نا ٹرائل شفاف الوکہ و اونا سزا آئین نا بنداوی حق انا رداٹ الوکہ پاکستان پیپلزپارٹی عدالت آتا شرف ءِ کیک و ننا مچ آ جہد ملک اٹی عدل و انصاف نا ساف و شفاف نظام و جمہوریت نا سوگوی کن ءِ ۔ اوپارے کہ شہید ذوالفقار علی بھٹو کیس اٹی عدالتی فیصلہ تاریخی غلطی ئس ہراناازالہ تو داسہ شاید ممکن اف، ولے سپریم کورٹ نا کنڈآن ہی سنگین غلطی نا اعتراف آن اسہ پوسکن ءُ روایت اس جوڑ مسنے، مستین نا غلطی تا سہی و خرینی تا چٹفنگ آن ہی شونہالی و شونداری نا سفر ترند مننگ کیک۔
