اسلام آباد۔ 08 مارچ (اے پی پی) سینیٹ اٹی اقتصادی راجی و سیاسی وڑاٹ زالبول آتے واکدار کننگ و صنفی بریبری ءِ پک کننگ کن قرارداد نا منظوری ءِ تس۔ جمعہ نادے آ سینیٹ نا دیوان اٹی سینیٹر ثانیہ نشتر قرارداد پیش کرے، قرارداداٹی پاننگانے کہ مچ آ دنیاٹی زالبول ومسن تا کنڈآن آخبتی بنداوتیا ہراوڑنا عدم مساوات و شواری تتون مون تننگک ، ہراٹی نئے بیرہ اقتصادی ، راجی و سیاسی اڑاند آک ہی آخا بلکن ایلو ویل آک ہم اوار ءُ، ہراڑآن اوفتا راج اٹ پبی کڑدادا کننگ اٹ اڑاندحائل مریک، سینیٹ سفارش کیک کہ حکومت زالبول آتا زرگزران اٹی شمولیت ءِ مون آ دننگ کن گام گیج آتے پک کے، ہراٹی ایلو گام گیج آتون گچین تعلیمی وکسب ہیل تننگ نا پروگرام تا کمک اٹ زالبول آتا تقرری ، اوفتے ملازمت آتیا برقرارتخنگ و اوفتا فن نا شونداری نا وارخواہی ءِ مون آدننگ ، اسٹریٹجک پلاننگ و تعلیمی اصلاحات نا کمک اٹ کمکاری طرزعمل تینا کننگ اٹ آسراتی نا فراوانی، اقتصادی بشخ آتیٹی زالبول آتیکن بنداوی پنجر اٹی زرکاری، صنفی حساسیت آ جوڑ پالیسی تے درستی راستی کننگ و داوڑنا ملازمتی ہند آتا چاگڑد ءِ جوڑ کننگ ہرافتے ٹی غٹ انا شمولیت ممکن مننگ کے و زالبول آتا راجی آسودہی ءِ اولیت تننگ مرے۔ پیشگی آگاہی ناکمک اٹ جان جوڑی و زچگی نا بابت فیصلہ غاتا کمک اٹ زالبول آتا وتواجہی کن قومی جان جوڑی پالیسی تیٹی اصلاحات درستی راستی کرفنگ، اسہ گچین و سوگو کانودی نظام عدل اناکمک اٹ زالبول آتا برخلاف ہروڑنا بیدادی نا چٹفنگ و کاروباری زالبول آتا است بڈی اوار مرے۔ ایوان حکومتی ادارہ سول سوسائٹی نا تنظیم، میڈیا تون اوار غٹ شریدار آتیان خواست کیک کہ او اجتماعی وڑاٹ جنسی مساوات و حقوق نسواں نا رکھ اکن تینا کڑد ءِ اداکیر، ایوان امنائی وڑاٹ قرارداد نا منظوری ءِ تس۔
