راولپنڈی۔ 08 مارچ (اے پی پی) پاک فوج انا سروک جنرل سید عاصم منیر پارینے کہ بلوچستان نا سرسہبی پاکستان نا سرسہبی ءِ، بلوچستان نا نرزور مخلوق آ گمر کینہ، دا نرزور ہرمشکل اٹی ثابت گامی اٹ سلوک ئسر، سلہہ بند فوج و کانود نافذ کروک آ ادارہ غاک الس تون اواری اٹ امن وشونہالی نا سفرءِ برجاتخرہ۔ آئی ایس پی آر نا رداٹ آرمی چیف جنرل سید عاصم منیر بلوچستان نا ضلع آواران نا دورہ ءِ کرے ، کورکمانڈر بلوچستان آرمی چیف ءِ بخیر کرے و اودے سیکورٹی نا حالیت آتا بارواٹی حوال تس۔ آرمی چیف جنرل سید عاصم منیر تینا دورہ ٹی شہید آتا خاہوت ، ہندی سرکڑدہ و بزغرآتون گپ وتران ہم کرے، آرمی چیف ءِ پاک فوج انا راجی و اقتصادی شونداری کن کروک آ کوشست آتا بارواٹی ہم معلومدار کننگا۔ آرمی چیف جنرل سید عاصم منیر ءِ پاک فوج انا صوبہ ٹی راجی، اقتصادی و کشاری شونداری نا بابت کروک آ کارروائی تا بابت ہم حوال تننگا۔ آرمی چیف دا وخت آ سرکڑدہ و ورناتیان تران کرسا کشت وکشار نا اہمیت و گرین پاکستان انیشیٹیو کن فوج انا عزم آ زور شاغا، آر می چیف شہید آتا قربانی تے زبردست خراج تحسین ہم پیش کرے۔ آرمی چیف پارے کہ پاک فوج شہید آتے خراج عقیدت پیش کننگ، سیکورٹی نا فراوانی و خیرخواہی ٹی اوفتے تون ہم کوپہ سلک، کشت وکشار ملکی شونداری ٹی اہمیت تخک، پاک فوج گرین پاکستان انیشیٹیو ٹی کمکاری ءِ برجاتخے۔ آرمی چیف پارینے کہ بزغرآتے کشاری آسراتی، آسان شڑت آتیا وام ، بج، کھد فراوان کننگک، بزغرآتے سولرٹیوب ویل و کشاری چاہندار آتا خذمت آتے ہم فراوان کننگ، بزغرآتے ملکی شونداری ٹی شریدار کننگ و کشارگری کن راہشونی ہم تننگک۔ اوپارے کہ بلوچستان نا سرسہبی پاکستان نا سرسہبی ءِ، بلوچستان نا نرزور مخلوق آ گمر کینہ، دا نرزور ہرمشکل اٹ ثابت گامی اٹ سلوک ئسر، سلہہ بند فوج و کانود نافذ کروک آ ادارہ غاک الس تون اواری اٹ امن و شونہالی نا سفرءِ برجاتخرہ۔ جنرل عاصم منیر پارے کہ پاک فوج بلوچستان اٹی سول انتظامیہ تون اواری اٹ شونداری و امداد نا عمل ءِ برجاتخک وخت اس کہ آرمی چیف بلوچستان نا الس کن اسہ پین کیڈٹ کالج اس جوڑ کننگ نا ہم ستا ءِ کرے۔ آرمی چیف جنرل عاصم منیر کیڈٹ کالج آواران نا بناءِ کرے و کالج نا استاد و طالب علم آتون ہم ملا۔ اوپاکستانی فوج انا تعلقدار ادارہ غاتون اواری اٹ بلوچستان اٹی ریلیف و تعمیری سرجزآتے برجاتخنگ نا عزم انا درشانی ءِ کرے۔
