اسلام آباد۔ 08 مارچ (اے پی پی) پاکستان نا پوسکن آ صدر مملکت نا گچین کاری کن پولنگ (پگہ) ہفتہ نا دے آ مریک۔ پارلیمنٹ ہائوس و ہر چار آ صوبائی اسمبلی تیٹی جوڑ پولنگ اسٹیشن تیا گچین مروک ا ٓباسک آک سہب انا 10 بجہ غان بیگہ نا 4 بجہ اسکان تینا حق رائے دہی ءِ کاریم اٹ اتنگ کیرہ۔ صدارتی گچین کاری ٹی حکمران اتحاد نا اومیتدار مسکوہی صدر آصف علی زرداری وسنی اتحاد کونسل وایلو اپوزیشن نا پندار اومیتدار محمود خان اچکزئی نانیام اٹ مقابلہ ءِ۔ سینیٹ وقومی اسمبلی نا پارلیمنٹ ناباسک آک ہائوس اٹی اسمبلی ہال اٹی تینا وونٹ ءِ شاغرہ۔ صدرنا گچین کاری اودیم رائے دہی نا بنداو آ مریک ہراڑے سینیٹ، قومی اسمبلی و بلوچستان اسمبلی نا ہر باسک انااسہ وونٹ اس شمارمریک وخت اس کہ پنجاب، خیبرپختونخوا وسندھ اسمبلی ٹی باسک آتا کچ ءِ بلوچستان اسمبلی نا بریبر وونٹ آتیتی بشخسا کچءِ کشنگک۔ صدر مملکت نا گچین کاری کن الیکشن کمیشن نا کنڈآن شیڈول یکم مارچ آ جاری کننگاسس ہرانا رداٹ پنداری کاغد آتے 2 مارچ اوفتا جانچ پڑتال ءِ 4 مارچ، پنداری کاغدٓتے پدی 5 مارچ وخت اس کہ ریٹائرمنٹ نا تاریخ 6 مارچ ءِ مقرر کننگاسس۔ الیکشن کمیشن صدارتی گچین کاری تیٹی بشخ ہلوک آ اومیتدار آتے پارینے کہ او پولنگ نا عمل نا بنامننگ آن مست تعلقدار ایوان یا اسمبلی ناباسک آتیان اسہ اسہ پولنگ ایجنٹ پندار کننگ کیرہ ہرا پولنگ و گنتی ناعمل نا مشاہدہ ءِ کیرہ۔
