مظفرآباد۔ 08 مارچ (اے پی پی) وزیراعظم محمد شہبا زشریف پارینے کہ بنجائی حکومت نا کنڈآن آزاد کشمیر اٹی پِر و برف انا زہمی تے 13 مارچ اسکان معاوضہ ادا کننگک، زہمی تے اوفتا اُراتیٹی آباد کننگ اسکان آسرات تولپنہ، پاکستان ءِ مون تروک چیلنج آتون مون تننگ کن ننے تینا جند آن ایڑترسا مرسا سیوت و یکجہتی اٹ مون آ ہنوئی مریک، وخت بسنے کہ زرگزران نا بابت بھلو فیصلہ کننگے ہرا اشرافیہ کن بے شک خرین مریر ولے اوفتا فائدہ لس بندغ ءِ رسینگے۔ اوداہیت ءِ جمعہ نادے آ داڑے آزاد کشمیر اٹی پِر و برف انا زہمی تتون اوڑدہی و گپ وتران کرسا پارے۔ داوخت آ وزیراعظم شہباز شریف ترند انگا پِر و برف اٹی زوال کروک آ بندغ آتا خاہوت آتیٹی کمکی چیک بشخا۔ داکان مست وزیراعظم آزاد کشمیر چوہدری انوارالحق نا کنڈآن وزیراعظم شہباز شریف ءِ ساڑی آ پِر تیان آزاد کشمیر اٹی مروک آ نسخان تیا حوال تننگا۔ اودے پاننگاکہ برف آن آزاد کشمیر اٹی 8 بندغ زوال کریر، 88 اُرا پورو وڑاٹ بھس مسر، وخت اس کہ 281 اُرا و 26 دوکان تے جزوی نسخان رسینگا۔ وزیراعظم شہباز شریف پارےکہ قدرتی آفت و پِر تیان جونی نسخان نا ازالہ انسانی وس اٹی اف دا غٹ اللہ نا رضاءِ، نن زوالکروک آ بندغ آتا بخشش و ٹھپی تا زوت جان جوڑی کن دعاکینہ، ای اوفتا خاہوت آتون مچ آ قوم و بنجائی حکومت نا کنڈآن ہڑزخواہی و است ہسونی کننگ کن بسنٹ۔ اوپارے کہ مصیبت نا داساہت اٹی نن زہمی تتون سلوک اُن۔ اوآزاد کشمیر نا وزیراعظم نا لائخی تا ستاءِ کرسا پارے کہ اوڑتون اواری اٹ زہمی تے اوفتا اُراتیٹی آباد کننگ اسکان آسرات تولپنہ۔ وزیراعظم پارے کہ زوال کروک آ بندغ آتا خاہوت آتیٹی بنجائی حکومت نا کنڈآن 20 لکھ روپئی فی کس نا کمکی چیک بشخانے، دُن تو انسانی جان نا ہچ ءُ قیمت اس اف، ولے حکومت نا زمواری ءِ کہ کزیت کروک آتا چوری چناتا کفالت ءِ کے و او زہمی تتون سلے و اوفتا ہرممکن کمک ءِ کے۔ وزیراعظم پارے کہ ٹھپی تے 5 لکھ روپئی نا امداد تننگک۔ پورو بھس مروک اُراتیا بنجانا کنڈآن 7 لکھ روپئی و جزوی نسخان آ مسہ نیم لکھ روپئی فی کس تننگک، دافتے انصاف نا نظام نا رداٹ بشخنگیک۔ اومیت ءِ کہ حکومت آزاد کشمیر نا عملہ موقع غا ہنسا جاچ ءِ ہلیک۔ این ڈی ایم اے حکومت آزاد کشمیر تون اواری اٹ پک کیک کہ حقدار اسے نا حق ءِ خلنگپ، داڑتون زہمی تیکن حکومت آزاد کشمیر تینا وڑاٹ ہم امداد کننگ کیک۔ شہباز شریف پارے کہ 13 مارچ اسکان زہمی تیکن دا امداد ءِ فراوان کننگک۔ اوپارے کہ آزاد کشمیر اسہ مشی و سخت انگا علاقہ غاتیا تالان زیبا ءُ علاقہ سے۔ وزیراعظم آزاد کشمیر برف و پِر تیٹی زہمی تا دمدستی امداد کن ہیلی کاپٹر نا روا خواست کرینے۔ داڑکن این ڈی ایم اے دمدستی وڑاٹ ہیلی کاپٹر فراوان کیک۔ اواین ڈی ایم اے نا چیئرمین ءِ پارت کرے کہ او زوت دا ہیلی کاپٹر ہلے ہرا بیرہ دا علاقہ غاتیان مختص مریک۔ شہباز شریف پارےکہ کشمیر پاکستان نا شہ رگ ءِ، ہندا قائد اعظم نا فرمان ءِ، کشمیر نامخلوق مشکل نا داساہت اٹی تینے تنیا تکپس۔ تینا کشمیری ایلم تے باور کرفنہ کہ ہرا پڑوآتے کرینن اوفتا مقررہ تاریخ آ پورومریک تانکہ تینا اُراتے تفنگ کیر۔ اوپارےکہ وزیراعظم آزادکشمیر تون شونداری کاریم تیا ہم گپ وتران مس۔ این ڈی ایم اے نا چیئرمین جنرل انعام، اسپیکر کانو دساز اسمبلی چوہدری لطیف اکبر، مسلم لیگ(ن) آزاد کشمیر ناصدر شاہ غلام قادر، قومی اسمبلی نا باسک عطاء اللہ تارڑ، چیف سیکرٹری ، آئی جی، آزاد کشمیر کابینہ نا باسک و پِر و برف آن زہمی بندغ آتا بھلو کچ اس ساڑی ئسر۔
