لاہور۔ 07مارچ (اے پی پی) رویت ہلال کمیٹی ریسرچ کونسل نا جنرل سیکرٹری خالد اعجاز مفتی پارینے کہ گمان ءِ اولیکو روچہ سے شنبے 12 مارچ آمریک۔ پنچ شنبےنادے آ جاری بیان اٹی اوپارے کہ 11 مارچ دوشنبے نادے شام انا مطلع ساف مننگ نا دروشم اٹ ہلال نا رویت بہ آسانی ممکن ءِ، ہنداسوب آن گمان ءِ اولیکو روچہ سے شنبے 12 مارچ 2024 آمریک۔ اوپارے کہ 10 مارچ انا شام دنیا نا اسہ ہم اسلامی ملک اسے ٹی ہلال نا رویت ممکن اف۔ پوسکن آ نوک 10 مارچ آ پاکستانی وخت انا رداٹ پیشیم نا 2 بجہ غا ودی مریک۔ 29 شعبان المعظم یعنی دوشنبے 11 مارچ انا شام غروب آفتاب نا وخت نوک انا وئی ہرا رویت ہلال کن 19 گھنٹہ غان زیات بایدے مرے۔ او پاکستان نا غٹ علاقہ غاتیٹی 28 گھنٹہ غاتیان زیات مریک۔ ایلو کنڈآ غروبِ شمس و غروب قمر نا نیام اٹ پرخ ہراکم از کم 40 منٹ مرے ، او کراچی ٹی 73 منٹ، جیوانی ٹی 74 منٹ، لاہور و کوئٹہ ٹی 76 منٹ، اسلام آباد اٹی 77 منٹ، پشاور، چارسدہ و مظفرآباد اٹی 78 منٹ وخت اس کہ گلگت اٹی 79 منٹ مریک ہندا سوب آن پاکستان نا ہرا علاقہ غاتیٹی ہم مطلع ساف مس ہموڑے ہلال نا رویت بہ آسانی ممکن مریک، ہندا سوب آن اومیت ءِ سے شنبے 12 مارچ آن روچہ مبارک بناکیک۔
