کوئٹہ۔ 07 مارچ (اے پی پی)ڈپٹی اسپیکر بلوچستان اسمبلی و پاکستان پیپلزپارٹی زالبول ونگ انا صوبائی صدر غزالہ گولہ پارینے کہ بھٹو نا مسٹ میکو چین ءِ انصاف ترفنگ آ مسکوہی صدر مملکت آصف علی زرداری نا منت وار اُن ، پاکستان پیپلزپارٹی نا سرکڑدہ و کارندہ غاک فیصلہ غان سرسہب مسنو، سپریم کورٹ نا سلاہ غان پک مسنے کہ شہید ذوالفقار علی بھٹو نا پاہونا فیصلہ عدالتی خون اس ئس۔ داڑے جاری مروک اسہ بیان اسے ٹی غزالہ گولہ پارے کہ پاکستان پیپلزپارٹی نا چیئرمین شہید ذوالفقار علی بھٹو اینو کانود نا غٹ آن بھلا عدالت اٹی ہم سرسہب مس، ذوالفقار علی بھٹو شہید ناقربانی تاریخ نا ناقابل فراموش واقعہ ءُ او ننا ساڑی و بروک آ چین آتون مدام زندہ سلک، شہید ذوالفقار علی بھٹو ملک و قوم و جمہوریت کن تینا جون تے ندر کرے۔ اوپارے کہ سپریم کورٹ نا صدارتی ریفرنس اٹی شہید بھٹو ءِ شفاف ٹرائل نا موقع ملپننگ نا سلاہ غا تالان فیصلہ غان پک مسنے کہ شہید ذوالفقار علی بھٹو نا پاہو نا فیصلہ غلط و عدالتی خون ئس اینو پاکستان نا غٹ آن بھلا عدالت سلاہ ترسا تاریخ ءِ سہی کرینے ، سپریم کورٹ ریفرنس آ تینا سلاہ ءِ ترسا آئین نا عملبرداری و حق سچ آ تالان فیصلہ تسنے ہراڑآن انصاف نا بول بالا مسنے۔
