اسلام آباد۔ 07 مارچ (اے پی پی) سینیٹ نا ریٹائرڈ مروک آ باسک آک پارینو کہ بلوچستان و خیبرپختونخوا نا قدرتی وسیلہ غاتے کاریم اٹ اتسا ملک اٹی روزگار نا وارخواہی تے ودفنگے۔ پنچ شنبے نادے آ سینیٹ نا دیوان اٹی تینا سپاروکی تقریرآتیٹی سینیٹر بہرہ مند خان تنگی پارے کہ تدوک آ 6 سال آتیٹی دا ایوان آن بھاز گڑاہیل کرین۔ اوپارے کہ دا ایوان ملک اٹی جمہوری عمل اٹ اہم کڑد ادا کرے، پی پی پی نا سرکڑدہ غاک دا ملک اٹی جمہوریت نا بقاکن قربانی تسر۔ اوپارے کہ سینیٹ نا عملہ و میڈیا نا منت وار اُٹ۔ سینیٹر مولوی فیض محمد پارے کہ بلوچستان نا معدنی وسیلہ غاتیان شپ ءِ، حکومت ءِ مرے کہ دا معدنی وسیلہ غاتیان فائدہ ہرفے۔ اوپارے کہ دا معدنی وسیلہ غاتے کاریم اٹ اتسا صوبہ و مچ آملک اٹی روزگار نا وارخواہیک ودرہ۔ سینیٹر مشتاق احمد پارے کہ تدوک آ 6 سال آتیٹی چندی ایشوتے ہرفنگا۔ اوپارے کہ خیبرپختونخوا قدرتی وسیلہ غاتیان شپ ء، حکومت آن خواست کیوہ کہ دا قدرتی وسیلہ غاتے کاریم اٹ اتنگے۔ سینیٹر محمد اکرم پارے کہ تدوک آ 6 سال اٹی دا ایوان آن بھاز گڑا ہیل کرین و ملک انا ویل آتا بابت نن توار بڑزکرین۔ سینیٹر سیف اللہ ابڑو پارے کہ او تینا پارٹی نا منت وار ءِ کہ او دا ایوان کن کنے گچین کرے و تدوک آ 6 سال اٹی ای تینا پارٹی نا نظریہ نا رداٹ ایوان نا کارروائی ٹی بشخ ہلکٹ۔
