کوئٹہ۔ 06 مارچ (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ چین، ایران ، امریکہ تون اوار چندی ملک آک پوسکن آ حکومت نا سروک شہباز شریف ءِ تہنیتی کلہو مون تسنو جہانی مالیاتی ادارہ ہم کمکاری نا باوری کرفینے، پوسکن آ حکومت ءِ بناآن بے شمار چیلنج آتون مون تروئی تمنگ ءِ ، وزیراعظم تینا اولین دورہ بلوچستان نا آفت زدہ شار گوادر نا کرسا گچین بناءِ کرینے، بلوچستان آ بے کچ چکار کننگ نا گرج ءِ۔ داڑے جاری مروک اسہ بیان اسے ٹی سینیٹر محمد عبدالقادر پارے کہ مستین اٹ حکمران بلوچستان نا ویل آتے فراموش کرسا کرینو بلوچستان نا الس نا ویل آتا ایسری وخت اس ہم حکمران تا اولیت آتیٹی اوار متنے ہندا سوب ءِ کہ بلوچستان بطور صوبہ و اونا محروم الس وخت اس ہم شون ہلنگ کتنو، گوادر ءِ سی پیک ڈٹ انا سوب آن جہانی اہمیت دوئی ءِ داجاگہ نا الس نا ویل آتے ایسر کننگ کن حکومت ءِ بھلا پیکج آتا دمدستی پڑو ءِ کروئی مریک تانکہ داجاگہ نا الس نا زند انا آب ءِ بڑز کننگ مرے۔ اوپارے کہ دنیا پاکستان نا گچین کاری تیان پد جوڑ مروک آ حکومت نا چاری ئس داسہ حکومتی باندات مستعدی اٹ مون آہِننگ نا گمان کننگ انگ ءِ اگہ ویل آتا ایسر ءِ پٹنگ اٹ سست روی نا درشانی ءِ کرے تو الس پین مین اٹ اختہ مریک حکومت ءِ زرگزرانی دباؤ آن پیش تمنگ کن دمدستی وڑاٹ خودانحصاری نا پالیسی ءِ تینا کرسا مون آ ہنوئی مریک و دامسخت کن بلوچستان نا وسیلہ غاک پاکستان نا تقدیر ءِ بدل کننگ کیرہ ولے دُن تو بلوچستان نا وسیلہ غاتیا غٹ آن اولیکو حق بلوچستان نا الس نا ءِ ہنداسوب آن اونا وسیلہ غاتے اوفتا زند انا آب ءِ گچین کننگ کن کاریم اٹ اتنگے۔ چیئرمین قائمہ کمیٹی پارے کہ ملکی اقتصادی ویل آتا ایسر سیاسی سوگوی تون وابستہ ءِ سیاسی سوگوی مریک تو حکومت یکسوئی اٹ الس نا شونداری و شونہالی کن گام گیج کننگ کیک اپوزیشن نا حکومت ءِ سہی سمت آ دننگ اٹ بے کچ اہم ءُ کڑد اس ادا کیک اگہ اپوزیشن نا جماعت آک غٹ ایشوز آ چکار کرسا اپوزیشن نا کڑد ءِ ادا کیک تو یقینا اسہ قومی ءُ خذمت اس کیک ورنہ بیرہ ہلڑ بازی آن ملک و قوم انا ویل آک ایسر مفسہ۔
