الیکشن کمیشن پنجاب آن 9 خورک نشست آتیا اومیتدار آتا گچین کاری کن شیڈول جاری کرے

اسلام آباد۔ 06 مارچ (اے پی پی) الیکشن کمیشن قومی اسمبلی ٹی زالبول آتا مخصوص نشست آتیا مسلم لیگ (ن) نا اولیتی فہرست پورو مننگ آ اوفتیان پنجاب آن 9 خورک نشست آتای اومیتدار آتا گچین کاری کن شیڈول جاری کرے۔ چارشنبے نا دے آ الیکشن کمیشن نا کنڈآن جاری کروک آ شیڈول نا رداٹ مسلم لیگ (ن) نا اومیتدار آتا کنڈآن پندار کاغد آتا 8 آن 9 مارچ وخت اس کہ اوفتا جانچ پڑتال 12 مارچ آ مریک۔ پندار کاغدآتا منظور یا مسترد کننگ نا برخلاف اپیل آتے 14 مارچ آ دائر کننگ مریک وخت اس کہ اوفتیا ایپلٹ ٹربیونل نا کنڈآن 16 مارچ آفیصلہ کننگک۔ اومیتدار آتا نظرثانی مروک فہرست 18 مارچ آ جاری کننگک۔ پندار کاغد آتے 19 مارچ آ پدی ہلنگ مریک۔ اومیتدار آتا گڈیکو فہرست ءِ 20 مارچ آجاری کننگک۔ یات سلے کہ سنی اتحاد کونسل ءِ زالبول و غیرمسلم تا مخصوص نشست ملپننگ نا فیصلہ غان پد دا نشست آتے اویلو پارلیمانی جماعت آتیٹی بشخنگانے۔