واشنگٹن۔ 05 مارچ (اے پی پی) امریکی محکمہ خارجہ نا ترجمان میتھیو ملر پارینے کہ امریکہ پاکستان تون تینا متکن آ شریداری ءِ قدر انا نظر اٹ ہرک و نن ہڑتوم آ ملک آتا اسیجائی فائدہ غاتے مون آ دننگ کن وزیراعظم شہباز شریف تون اواری اٹ کاریم کینہ۔ امریکی ترجمان تدوک آ دے ہڑدے ئی حوال اٹی شہباز شریف نا بطور وزیر اعظم پاکستان گچین کاری تا بابت اسہ سوج اسے نا ورندی ٹی پارے کہ نن مہالو ہم پارینن کہ ، نن پاکستان تون تینا متکن آ شریداری ءِ قدر انا نظر اٹ ہرنہ و مدام اسہ سوگو، شونہال و جمہوری پاکستان ءِ ہڑتوم آ ملک آتا فائدہ غاتیکن اہم تکنہ۔ اوپارے کہ پاکستان نا پوسکن آ وزیراعظم شہباز شریف و اونا حکومت تون ننا گپ وتران اسیجائی فائدہ غاتے مون آ دننگ آ چکار کیک۔ ترجمان مریم نواز نا اولیکو زالبول وزیراعلیٰ گچین مننگ نا خیرمقدم ءِ کرسا اودے پاکستانی سیاست اٹ اہم مزل گوندانے۔ اوپارے کہ نن زالبول آتے ملک انا سیاست، زرگزران اٹی، بشمول یوایس پاکستان ویمن کونسل، سول سوسائٹی و ایلو فیصلہ سازی نا بشخ آتیٹی شمولیت کن پاکستان تون کمکاری نا چاری ءِ۔ اوپارے کہ دا شمولیت آن پاکستان نا سوگوی و شونہالی ٹی ودکی مریک ہرا غٹ پاکستانی شاری تا فائدہ غاتیٹی ءِ، او پارے کہ ہراتم نن دنیا ٹی ہراڑے کہ زالبول آتا شمولیت ءِ خننہ تو ننے خوشی مریک۔
