اسلام آباد۔ 05 مارچ (اے پی پی) یوٹیلیٹی اسٹورآتیا روچہ مبارک آن مست بنداوی آ گڑاتیا 7.5 ارب روپئی نا خصوصی سبسڈی نا بنا(اینو) سے شنبے آن مسنے۔ یوٹیلیٹی اسٹورزکارپوریشن اسٹورز نا ترجمان نا رداٹ وزیراعظم نا کنڈآن پڑو کروک الس نا آسراتی کن روچہ مبارک نا تُو اٹی 7.5 ارب روپئی نا خصوصی سبسڈی آبنداوی گڑاتا فراوانی سے شنبے پنچ مارچ آن بناکننگانے۔ بنجائی حکومت نا دا خصوصی پیکج نا رداٹ یوٹیلیٹی اسٹورز کارپوریشن نا کمک اٹ الس ءِ 19 بنداوی کنوئی آ گڑا بشمول نُت، سی، کنوئی آ تیل، بورہ، دال، چنا، پیہن آ چھولے ، بیسن، کجھور، برنج، چاہ ، مصالحہ، پال و شربت آتے رعایتی نرخ آتیا فراوان کننگک۔ ترجمان نا رداٹ یوٹیلیٹی اسٹورز کارپوریشن روچہ ٹی الس نا گرج آتے مون آ تخسا غٹ غذائی گڑاتا بھلو کچ اسے ٹی دستیابی ءِ پک کیک۔ داوار دا رعایت ٹارگیٹڈ سبسڈی نا کمک اٹ بی آئی ایس پی ٹی PMT-40نا جاگہ غا PMT-60نا رجسٹرڈ نیزگار و نیامی خاہوت آتے ملک و پی ایم ٹی۔ 60 نا سوب آن 20 کروڑ الس دا پیکج آن فائدہ ہرفنگ کیرہ۔ نوٹیفکیشن نا رداٹ روچہ پیکج نا رداٹ چاہ نا 800 گرام نہاد اٹی 100 روپئی، بیسن و کھجور نا فی کلو نہاد اٹی 50 روپئی، پال انا فی لیٹر ٹیٹراپیک نا نہاد اٹی 30 روپئی، دال و چاول نا فی کلو نہاداٹی 25 روپئی، کنوئی آ تیل انا فی لیٹر نہاد اٹی 25 روپئی و شربت آتا 800 ملی لیٹر نہاد اٹی 30 روپئی نا کمتی کننگانے۔ داکان بیدس بی آئی ایس پی صارف آتیکن بورہ نا فی کلونہاد 109 روپئی، سی 365 روپئی و نت انا 10 کلوتھیلہ نا نہاد 648 روپئی برقرار مریک۔ یوٹیلیٹی اسٹورتیا روچہ ریلیف پیکج نا اطلاق 5 مارچ آن مریک ہرا نوک اناخننگ اسکان برجاسلک۔ جنرل صارف آتیکن 1000 آن زیات گڑاتیا ہم 15 درسداسکان خصوصی رعایت تننگانے۔ ہرانا لسٹ آتے روچہ ٹی الس نا آسراتی کن غٹ اسٹورتیا خلنگک۔ روچہ مبارک اٹی کنوئی آ گڑاتا فراوانی ءِ پک کننگانے ہراڑآن الس ءِ اسہ ہم دشواری اسے تون مون تروئی تمپک۔ روچہ ٹی مچ آملک انا غٹ یوٹیلیٹی اسٹورالس نا خذمت کن ہردے نا رداٹ ملوک مریرہ۔
