دبئی۔ 05 مارچ (اے پی پی) متحدہ عرب امارات اٹی پاکستان نا سفیر فیصل نیاز ترمذی پارینے کہ پاکستان و متحدہ عرب امارات نا نیام اٹ بے مٹ تعلقداری ءِ و پاکستانی پردیسیک متحدہ عرب امارات نا شونداری ٹی نمان کڑد ادا کرینو، تعمیرات نا بشخ اٹی بھلو آزموندہ اس تخوک متحدہ عرب امارات نا زرکارآک پاکستان اٹی ریئل اسٹیٹ و انفراسٹرکچر نا بشخ اٹی زرکاری نا بھلو وارخواہی اس دوئی کننگ کیرہ۔ سے شنبے نادے آ قونصلیٹ جنرل آف پاکستان دبئی نا کنڈآن جاری بیان اٹی داخیال آتا درشانی ءِ او داڑے کاروباری وارخواہی کانفرنس آن تران کرساکرے۔ اوپارے کہ ای پکا یخین تخیوہ کہ پوریاگر آک حقی راہشون ءُ ہرا زرگزران ءِ شونداری نا کنڈآ دننگ کیرہ، نن پاکستان و متحدہ عرب امارات نا کاروباری برادری نا نیام اٹ بزنس ٹو بزنس کمکاری نا است بڈی ءِ کینہ۔ پاکستانی سفیر داوخت آ اماراتی زرکارآتے پاکستان نا ریئل اسٹیٹ ، توانائی، کشت وکشار، آئی ٹی و ایلو بشخ آتیٹی زرکاری کننگ نا سلہ ہم خلک۔ سفیر فیصل نیاز ترمذی دبئی کاروباری بزنس وارخواہی کانفرنس اٹی بشخ ہلنگ آ متحدہ عرب امارات نا وزارت اقتصادیات نا ڈاکٹر عبدالرحمان حسن المعینی نا منت واری ءِ ہرفے۔ داکانفرنس حبطور پیلس دبئی ٹی اڈ ہلک ہراٹی متحدہ عرب امارات و پاکستان نا 100 آن زیات پوریاگرآک بشخ ہلکر۔ فیصل نیاز ترمذی پارے کہ پاکستان نا 60 درسد آن زیات آبادی 30 سال آن کم وئی بندغ آتیا تالان ءِ، پاکستان کم و ود 250 ملین آبادی نا ملک ءِ ہرا چندی بشخ آتیٹی زرکاری نا بے پناہ وارخواہی فراوان کیک۔
