گوادر۔ 05 مارچ (اے پی پی)وزیراعظم محمد شہباز شریف ملک اٹی ساڑی آ پِر تیٹی زوال کروک آتا خاہوت آتے 20 لکھ وخت اس کہ ٹھپی تے 5 لکھ روپئی فی کس امداد نا پڑو کرسا پارینے کہ پِر آن مروک آ نسخان تا پوروی ءِ کننگک، زہمی تا آبادکاری اسکان امداد ءِ برجاتخنہ، الس نا خذمت حکومت نا فرض ءِ، پرو بھس مروک آ اُراتا مالک آتے 7 ءُ نیم لکھ روپئی معاوضہ تننگک۔ سے شنبے نادے آ وزارت عظمیم نا سوغند ہرفنگ نا بروک آ دے وزیراعظم شہباز شریف ساڑی آ طوفانی پِر تیان زہمی گوادر نا دورہ ءِ کرے۔ داوخت آوزیراعلیٰ بلوچستان میر سرفراز بگٹی وزیراعظم ءِ بخیرکرے۔ وزیراعظم جہاز اٹی چیئرمین این ڈی ایم اے لیفٹیننٹ جنرل انعام حیدر ملک تون گوادر و سویلی بلوچستان ٹی ساڑی آ طوفانی پِر تیان مروک آ نسخان و برجاکمکی کارروائی تیا حوال ہلک۔ وزیراعظم ءِ ملک انا ایلو علاقہ غاتیٹی نسخان و زہمی تا کمک کن گام گیج آتیا ہم سرجم حوال تننگا۔ وزیراعظم پارت کرے کہ پوسکن آ ٹیکنالوجی و سیٹلائٹ نا کمک اٹ قدرتی آفت آتا وخت آن مست تعین ءِ کننگ کن نظام اس جوڑ کننگے۔ زہمی مواصلاتی پنجر نا بحالی و نجی ملکیت آتا نسخان نا سرجم جاچ آ زوت رپورٹ اس پیش کننگے۔ ساڑی آ طوفانی پِر تا زہمی تا کمک و بحالی کن اسہ جوان ءُ پلان اس مرتب کرسا پیش کننگے۔ زہمی تا ریسکیو و کمک ءِ وس آن زیات کننگے۔ اوکان پد وزیراعظم زہمی تیکن جوڑ خیمہ بستی ٹی زہمی تیٹی کمکی گڑاو چیک بشخا۔ داوخت آ وزیراعظم ءِ پِر تیان مروک آ نسخان تا سرجمی اٹ حوال تننگا۔ وزیراعظم ءِ پاننگاکہ ساڑی آ پِر تیان گوادر اٹی 3100 اُرا زہمی مسر۔ جیوانی ٹی 125، پسنی ٹی 25، سنسر اٹی 260 اُراتے نسخان رسینگا۔ 93 اُرا پورو بھس مسنو۔ پِر تیان 200 ساہدار تے نسخان رسینگا۔ 19 زہمی شاہراہ تے بحال کننگانے۔ مر مر انگا علاقہ غاتیٹی نیوی و حکومت بلوچستان نا ہیلی کاپٹر آتا کمک اٹ کمکی گڑاتے سرکننگا۔ زہمی تے طبی آسراتی تا فراوانی کن آرمی و سول ادارہ غاتا کنڈآن میڈیکل کیمپ خلنگا۔ داوخت آ وزیراعظم محمد شہباز شریف زہمی و میڈیا تون گپ وتران کرسا پارے کہ 26 فروری آ طوفانی پِر تیٹی گوادر وبلوچستان نا ایلو بشخ آتیٹی بھسکاری تالان کرے۔ اللہ نا شکر ءِ گوادر اٹی ہچ ءُ جانی نسخان ا س متنے۔ بلوچستان اٹی 5 بندغ زوال کریر اوفتا خاہوت آتون ہمدردی و ہڑزخواہی نا درشانی ءِ کینہ۔ ٹھپی تا زوت دراخ جوڑی کن دعا کینہ۔ اووزیراعلیٰ بلوچستان ءِ سوغند ہرفنگ نا دمدستی پد زہمی علاقہ گوادر آ سرمننگ آ خراج تحسین پیش کرسا پارے کہ وزیراعلیٰ مشکل وخت اٹی دمدستی دانگیا سرمس و زہمی تا تینا وس انارداٹ کمک ءِ کرے۔ دا احسان اس اف بلکن بطور گچین حکومت ننا فرض ءِ۔ نن زہمی تتون سلوک اُن۔ وزیراعلیٰ بلوچستان نا کماشی ٹی غٹ نسخان تے پورو کینہ۔ اوپاک فوج، نیوی ، کوسٹ گارڈ ، پی ڈی ایم اے سندھ انا منت واری ءِ ہرفے ہرافک زہمی تے کمکی گڑا سرکننگ، دیر انا کشنگ، و ریلیف نا کاریم تیٹی دمدستی کمک کریر۔ حکومت بلوچستان و ہندی انتظامیہ نا کنڈآن کروک آ گام گیج آتا ستاءِ کرے۔ اوپارے کہ مصیبت اٹی تینا ایلم تتون سلنگ نا پرمان ننا مذہب ہم ایتک۔ دا فرض انا ادائیگی ٹی ہچ ءُ ڈیوالئی اس کپنہ۔ اوپارے کہ 2022اٹی موسمیاتی بدلی تیان دا علاقہ غاتیٹی طوفانی پِر و نوکاپ آن بھلو نسخان اس مس، نن دا وخت آ ہر زہمی جاگہ غا سرمسن و بنجائی حکومت زہمی تیٹی 100 ارب روپئی بشخا۔ نن تینا وس و سنگت ملک آتا کمک اٹ انصاف و شفاف وڑاٹ زہمی تسکان امداد ءِ سرکرین۔ اوپارے کہ ساڑی آ طوفانی پِر تیٹی مچ آملک اٹی 44 بندغ زوال کریر۔ اللہ اوفتا بخشش ءِ کے۔ ہر زوال بندغ نا خاہوت ءِ 20 لکھ، ٹھپی ءِ 5 لکھ وخت اس کہ بھس مروک آ اُرا نا مالک ءِ ہفت ءُ نیم لکھ روپئی معاوضہ ایتنہ۔ اوساڑی آ کمکی کارروائی تیٹی پبی کارکڑد تخوک ادارہ غاتا ملازم و ریلیف و بحالی نا کاریم تیٹی لگوک مخلوق ءِ سفتی سند تننگ نا پڑو کرے۔
