گوادر۔ 05 مارچ (اے پی پی) وزیراعظم محمد شہباز شریف تعلقدار کمامدارآتے پارت کرینے کہ گوادر نا طوفانی پِر تیان زہمی بندغ آتا بحالی و امداد کن وس آن زیات کمک کننگے، زہمی مواصلاتی پنجر نا بحالی و نجی ملکیت آتا نسخان نا سرجم آتا جاچ آ زوت رپورٹ اس پیش کننگے، ساڑی آ طوفانی پِر تا زہمی تا کمک و بحالی کن اسہ جوان ءُپلان اس مرتب کرسا پیش کننگے۔ وزیراعظم آفس نا میڈیا ونگ آن جاری بیان نا رداٹ وزارت عظمیٰ نا سوغند ہرفنگ نا بروک آ دے سے شنبے آ وزیراعظم گوادر آ سرمس۔ گوادر آ سرمننگ آ وزیراعلیٰ بلوچستان میر سرفراز بگٹی اودے بخیرکرے۔ وزیراعظم کمکی کیمپ اٹی ساڑی طوفانی پِر تا زہمی تیٹی کمکی گڑا بشخا۔ داوخت آ او زہمی بندغ آتون گپ وتران کرسا پارے کہ وزارت عظمیٰ نا سوغند ہرفنگ تون ہی او دانگیا بسنے ، دُن مننگ کپک کہ گوادر اٹی طوفانی پِر تا زہمی تے دامشکل وخت اٹی تنیا اِلنگے۔ داکان مست وزیراعظم دوران پرواز چیئرمین این ڈی ایم اے لیفٹیننٹ جنرل انعام حیدر ملک آن گوادر و سویلی بلوچستان اٹی ساڑی آ طوفانی پِر تیان مروک آ نسخان و برجاکمکی کارروائی تیان حوال ہلک۔ وزیراعظم ءِ ملک انا ایلو علاقہ غاتیٹی نسخان و زہمی تا کمک کن گام گیج آتیا ہم سرجم حوال تننگا۔ وزیراعظم پارے کہ پوسکن آٹیکنالوجی و سیٹلائٹ نا کمک اٹ قدرتی آفت آتون وخت آن مست آگاہی کن نظام اس جوڑ کننگے۔ وزیراعظم پارت کرے کہ زہمی مواصلاتی پنجر نا بحالی و نجی ملکیت آتا نسخان نا سرجمی اٹ جاچ آ تالان رپورٹ اس زوت پیش کننگے، ساڑی آ طوفانی پِر تا زہمی تا کمک و بحالی کن اسہ جوان ءُ پلان اس مرتب کرسا پیش کننگے، زہمی تا ریسکیو و اوفتا کمک ءِ وس آن زیات کننگے۔
