اسلام آباد۔ 05 مارچ (اے پی پی) وزیراعظم محمد شہباز شریف تون مسکوہی صدر آصف علی زرداری و چیئرمین بلاول بھٹو زرداری نا کماشی ٹی پاکستان پیپلزپارٹی نا ڈل اوڑدہی کرے و وزیراعظم ءِ وزارتِ عظمیٰ نا منصب ءِ سنبھالنگ آ مبارکبادی تس و اوڑکن نیک است خواہی نا درشانی ءِ کرے۔ سے شنبے نادے آ وزیراعظم آفس نامیڈیا ونگ آن جاری بیان نا رداٹ وزیراعظم تون اوڑدہی کروک آ پاکستان پیپلزپارٹی نا ڈل اٹی وزیراعلیٰ سندھ مراد علی شاہ ہم ساڑی ئس۔ داوخت آ سینیٹر اسحاق ڈار، سینیٹر اعظم نذیرتارڑ و مسکوہی نگران وزیراعلیٰ پنجاب سید محسن نقوی ئسک ہم ساڑی ئسر۔ ڈل وزیراعظم ءِ وزارت ءِ عظمیٰ نا منصب ءِ سنبھالنگ آ مبارکبادی تس و نیک است خواہی نا درشانی ءِ کرے۔ آصف علی زرداری وزیراعظم ءِ باوری کرفے کہ پاکستان پیپلزپارٹی پاکستان نا زرگزرانی سوگوی وشونداری و شونہالی کن حکومت تون سلک۔ داوخت آ وزیراعظم محمد شہباز شریف پارے کہ خدائے بزرگ و برتر و الس نا است انا حب اٹ منت وار اُٹ ہرافک پاکستان نا خذمت کن اسہ وارولداموقع تسر۔ خادم پاکستان گچین کننگ کن ایوان اٹی تینا سیوتی جماعت آتا پت آ اوفتا منت واری ءِ ہرفیوہ۔ اوپارے کہ خداناکرم و تینا خواری اٹ پاکستان نا شونداری و شونہالی کن دے ونن کاریم کننگ کن سنبرینگوک اُن۔
