وزیراعلیٰ بلوچستان میر سرفراز بگٹی آن خواست کینہ کہ صوبائی اسمبلی نا باسک بخت محمد کاکڑ ءِ وزارت تعلیم نا قلمدان ءِ تننگے انتئے کہ خواجہ دا وزارت ءِ چلیفنگ نا پبی لائخی تخک، راجی راہشون عبدالقہار کاکڑ

کوئٹہ۔ 04 مارچ (اے پی پی) راجی راہشون عبدالقہار کاکڑ پوسکن گچین مروک آوزیراعلیٰ بلوچستان میر سرفراز بگٹی ءِ وزارت اعلیٰ نا عہدہ ءِ سنبھالنگ آ مبارکبادی ترسا اومیت ظاہر کرینے کہ بلوچستان نا الس و سیاسی جماعت آک اوڑا ہراپت انا درشانی ءِ کرینو اواوڑآ پورو سلنگ نا پبی کوشست کیک و الس ءِ مون تروک ویل آتا ایسری کن عملی گام گیج کیک۔ داڑے جاری مروک اسہ بیان اسے ٹی عبدالقہار کاکڑ پارے کہ میر سرفراز بگٹی اسہ خوانوک و جوان ءُ سیاست دان اسے اونا وزیراعلیٰ بلوچستان گچین مننگ آن صوبہ نا الس اٹی مروک آ مایوسی نا چٹفنگ اٹ کمک رسینگک۔ اوپارے کہ نن وزیراعلیٰ بلوچستان میر سرفراز بگٹی آن خواست کینہ کہ صوبائی اسمبلی نا باسک بخت محمد کاکڑ ءِ وزارت تعلیم نا قلمدان ءِ تننگے انتئے کہ خواجہ دا وزارت ءِ چلیفنگ نا پبی لائخی تخک اونا صوبہ و خاص کر کوئٹہ نا الس کن خذمت آک کس اسے نا ڈکھوک افس۔