قوم ءِ مون تروک زرگزرانی ویل آتا ایسری کن غٹ سیاسی وکدارآک اواری اٹ تینا کڑد ءِ ادا کیر، عدالتی و گچین کاری اصلاحات نا گرج ءِ، بلاول بھٹو زرداری

اسلام آباد۔ 04 مارچ (اے پی پی) پاکستان پیپلزپارٹی نا چیئرمین و قومی اسمبلی نا باسک بلاول بھٹو زرداری وزیراعظم نا میثاق معیشت و مفاہمت نا خیرمقدم ءِ کرسا پارینے کہ قوم ءِ مون تروک چیلنج و زرگزرانی ویل آتا ایسری کن غٹ سیاسی واکدار آک اواری اٹ تینا کڑد ءِ ادا کیر ، ہژدہ می ترمیم نا رداٹ ایلو ماندہ وزارت آتے صوبہ غاتے گدریفنگ و اشرافیہ کن سبسڈیز نا چٹفنگ آن الس ءِ ریلیف ملنگ کیک، عدالتی و گچین کاری اصلاحات نا گرج ءِ، سانحہ 9 مئی نا جاست وپاست کن جوڈیشل کمیشن نا جوڑ کننگ نا خواست انا تائید ءِ کینہ۔ دوشنبے نادے آ قومی اسمبلی ٹی گپ وتران کرسا بلاول بھٹو زرداری پارے کہ او تینا خاہوت نا مسٹ میکو چین نا نمائندہ ءِ ہرا داایوان اٹی مسٹ میکو وار گچین مسنے، دا ماڑی نا بنداو ءِ شہید ذوالفقار علی بھٹو تخاسس۔ دا ایوان ننا غٹ انا ءِ، پارلیمنٹ غٹ ادارہ غاتا لمہ نا حیثیت ءِ تخک، اگہ نن دادے سوگو کینہ تو ننا غٹ ادارہ بنجاو جمہوری نظام سوگو مریک۔ بلاو ل بھٹو زرداری پارے کہ ای تینا دا بزرگ آتیان خواست کیوہ ہرا شش شش وار دا ایوان نا باسک گچین مسنوکہ نن ہندن ءُ فیصلہ کین  ہرافتیان ملک انا ورناتا آخبت روشنا مننگ کے، اگہ او ورناک دا ایوان نا باسک گچین مننگ خوار تو اوفتے کن آسانی ودی مرے۔ اوپارے کہ اسپیکر و وزیراعظم نا گچین کاری نا وخت آ انتس کہ مس اگہ ہنداوڑ مرسا کرے تو الس مایوس مریک۔ ملک انا زرگزرانی تنکی آن ہر بندغ واقف ءِ مخلوق ویل آتا گواچی ءِ، الس خواہک  ملک ءِ زرگزرانی تنکی آن کشنگے۔ کبینی، نیزگاری وبیروزگاری چٹے۔ وزیراعظم تینا تقریراٹی تینا اہم ڈٹ آتیا ہیت کرے، قائد حزب اختلاف ہم تینا ہیت ءِ کرے، حزب اختلاف نا موقف ہم بایدے ٹی وی آ کائے۔ اوپارےکہ نناکارندہ غاک گچین کاری مہم اٹی تینا جون تے ندر کرینو تو نن داتسکان سرمسونن۔ کراچی نا 12 سال انا چناعبدالرحمان ءِ شہید کننگا، موروٹی بلال زرداری، نوشیروفیروز اٹی منصور علی، رضاکھوسو شہید مسر ۔ بلوچستان اٹی ننا اومیت دارآتا ریلی تیا گرنیڈ جلہو کننگا ہراٹی ننا کارندہ غاک شہید و ٹھپی مسر۔ دا غٹ واقعہ غاتا مذمت ءِ کرسا اوپارےکہ ایوان نا ہڑتوم آ کنڈآتا باسک آتے داہیت آ امنائی کروئی  مریک کہ اسہ گچین کاری اسے ٹی ہم نہادی جون زیان مف، ای شہید آتا خاہوت آتے باوری کرفیوہ کہ اوفتا قربانیک زیان مفسہ۔ بلاول بھٹو وزیراعظم شہباز شریف ، وزیراعلیٰ مریم نواز، وزیراعلیٰ علی امین گنڈاپور، وزیراعلیٰ بلوچستان سرفراز بگٹی وزیراعلیٰ سندھ مرا دعلی شاہ ءِ مبارکبادی تس و اومیت ظاہر کرے کہ او الس نا ویل آتے ایسر کیرہ۔ اوپارےکہ وزیراعظم ہراگام گیج آتا پڑو ءِ کرینے اگہ اوفتیا عملدرآمد مس تو انشاء اللہ غٹ ویل آتا مون ءِ توننگ مریک۔