اسپیکر قومی اسمبلی سردار ایاز صادق نا سید مراد علی شاہ تون اوڑدہی، وزیراعلیٰ سندھ گچین مننگ آ مبارکبادی تس

اسلام آباد۔ 04 مارچ (اے پی پی) اسپیکر قومی اسمبلی سردار ایاز صادق پارینےکہ مراد علی شاہ نا مسٹ میکو وار وزیراعلیٰ سندھ انا عہدہ غا گچین کاری پاکستان پیپلزپارٹی نا سرکڑدہ و سندھ اسمبلی نا باسک آتا نا لائخی تیا پبی پت انا درشانی ءِ۔ قومی اسمبلی سیکرٹریٹ آن جاری بیان نا رداٹ داخیال آتا درشانی ءِ او وزیراعلیٰ سندھ سید مراد علی شاہ تون گپ وتران کرساکرے ہرا دوشنبے نادے آ داڑے اوڑتون اوڑدہی کرے۔ داوخت آ ڈپٹی اسپیکر قومی اسمبلی سید مصطفیٰ شاہ و قومی اسمبلی نا باسک  سید نوید قمرئسک ہم ساڑی ئسر۔ اوڑدہی ٹی تین پہ تینی است خواہی نا امور آ گپ وتران کننگا۔ اسپیکر قومی اسمبلی سید مراد علی شاہ ءِ وزیراعلیٰ سندھ گچین مننگ آ مبارکبادی تس۔ اوپارے کہ نا مسٹ میکو وار وزیراعلیٰ سندھ انا عہدہ غا گچین کاری پاکستان پیپلزپارٹی ناسرکڑدہ و سندھ اسمبلی نا باسک آتا نا لائخی تیا پبی پت انا درشانی ءِ، نا سرکڑدہ ئی ٹی صوب سندھ تدوک آ دور تیانبار آخبت اٹ ہم شونداری و شونہالی نا مزل آتے طے کیک۔ اسپیکر ایاز صادق نا سید مرادعلی شاہ نا بطور وزیراعلیٰ سندھ سرسہبی کن نیک است خواہی نا درشانی ءِ کرے۔ وزیراعلیٰ سندھ سید مراد علی شاہ ہم اسپیکر سردار ایاز صادق ءِ مسٹ میکو وار اسپیکر قومی اسمبلی گچین مننگ آمبارکبادی تس وپارے کہ اسپیکر نا عہدہ غا مسٹ میکو وار بھلو گیشتری اسے اٹ گچین مننگ سیوتی جماعت آتا سرکڑدہ واسمبلی نا باسک آتا نا قائدانہ لائخی تیا پبی پت انا ڈیک ءِ۔ اوپارے کہ نی بطور اسپیکر ہراجوانی اٹ تدوک آ دور اٹی ایوان نا کارروائی ءِ چلیفیس اوسفت نا قابل ءِ۔ وزیراعلیٰ سندھ ہم اسپیکر سردار ایاز صادق کن نیک است خواہی نا درشانی ءِ کرے۔ وزیراعلیٰ سندھ ڈپٹی اسپیکر سید مصطفیٰ شاہ ءِ ہم ڈپٹی اسپیکر قومی اسمبلی  گچین مننگ آ مبارکبادی تس۔