اسلام آباد۔ 01 مارچ (اے پی پی) الیکشن کمیشن سینیٹ نا چندی باسک آتا قومی و صوبائی اسمبلی نا باسک انا وڑاٹ سوغند ہرفنگ آن خور مروک آنشست آتیا ضمنی گچین کاری نا شیڈول ءِ جاری کرے۔ دا نشست آتیا گچین کاری 14 مارچ آمریک ۔ جمعہ نادے آ الیکشن کمیشن نا کنڈآن جاری شیڈول نا رداٹ سید یوسف رضاگیلانی، مولانا عبدالغفور حیدری قومی اسمبلی نا باسک گچین مسنو ۔ نثار کھوڑو، جام مہتاب حسین ڈاہر سندھ اسمبلی وخت اس کہ سرفراز احمد بگٹی، پرنس احمد عمرزئی بلوچستان اسمبلی نا باسک گچین مسنو۔ اوفتا لس گچین کاری تیٹی سرسہبی و سوغند آن خورک مروک آ نشست آتیا گچین کاری کن شیڈول جاری کننگا ہرانا رداٹ اومیتدار آتا کنڈآن پندار کاغد آتے 2و3 مارچ آ جمع کرفنگ مریک۔ اومیتدار آتا بنائی لڑ 3 مارچ وخت اس کہ اوفتا جانچ پڑتال 5 مارچ آمریک۔ پنداری کاغد آتا منظور یا مسترد کننگ نا برخلاف اپیل 7 مارچ، دافتیا ٹربیونل نا کنڈآن فیصلہ 9 مارچ وخت اس کہ پنداری کاغد آتے 10 مارچ آ پدی ہلنگ مریک۔ پولنگ 14 مارچ آ پارلیمنٹ ہاؤس ، سندھ و بلوچستان اسمبلی تا ماڑی تیٹی 9 آن 4 بجہ اسکان مریک۔
