کوئٹہ۔ 01 مارچ (اے پی پی) پندار وزیراعلیٰ بلوچستان میر سرفراز بگٹی پارینے کہ دونیم سال انا حکومتی فارمولا نا بابت اودے ہچ سمااف پارٹی نا بڑزکو سرکڑدہ ہرا فیصلہ ءِ کیک ننے قبول ءِ، پاکستان پیپلزپارٹی صوبہ نا باندات آتے ایسر کننگ کن سیاسی ڈائیلاگ آ یخین تخک ، ناراض مخلوق بیدادی نا جاگہ غا مذاکرات نا کسر ءِ تینا کیر۔ داخیال آتا درشانی ءِ او بلوچستان اسمبلی ٹی میڈیا تون گپ وتران کرسا پارے، انا مستی پاننگ ئس کہ چیئرمین پیپلزپارٹی بلاول بھٹو، و کوچیئرمین آصف علی زرداری نا منت واری ءِ ہرفیوہ اوفک کنے آ پت کرسا وزیراعلیٰ کن پندار کریر کنا کوشست مریک صوبہ نا شونداری و شونہالی کن غٹ جماعت آتے اواری اٹ دیوکاو و صوبہ ٹی گڈ گورننس ءِ گچین کیو، اوپارے کہ دونیم سال انا فارمولا نا بابت علم اف دا بارواٹی بڑزکو سرکڑدہ غاک ہرافیصلہ ءِ کیرہ قبول ءِ، داوخت آ پیپلزپارٹی نا مرکزی راہشون و باسک اسمبلی نواب ثناء اللہ زہری پارے کہ پندار وزیراعلیٰ بلوچستان میر سرفراز بگٹی ءِ مبارکبادی ترسا پارے کہ ننا پورو کمکاری سرفراز بگٹی تون مریک ہراوڑ او صوبائی وزیر داخلہ نا وڑاٹ گچین کاریم کرے ہندا وڑ وزیراعلیٰ نا عہدہ غا رہینگسا صوبہ نا ویل آتے ایسر کننگ کن کوشست کیک۔ داوخت آ پیپلزپارٹی نا صوبائی صدر چنگیز جمالی پارے کہ پاکستان پیپلزپارٹی صوبہ ٹی بھلو گیشتری اس دوئی کرینے بلاول بھٹو و آصف زرداری سرفراز بگٹی ءِ وزیراعلیٰ بلوچستان پندار کرینے پاکستان پیپلزپارٹی السی ویل آتا ایسری کن ہرممکن کوشست کیک۔
