کوئٹہ۔ 01 مارچ (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ پاکستان آن انسانی اسمگلنگ نا گندہ انگا گوازی خوفناک ءُ حالیت اس اختیار کرینے مچ آ ملک اٹی انسانی اسمگلنگ اٹی اوار بندغ آک بیوس و سادہ انگا مخلوق ءِ گچین و روشنا آخبت ناتغ ءِ نشان ترسا پلرہ و اوفتے ہموعلاقہ و ملک آتیا دِکہ ایترہ ہراڑے اوفتا مون آ بیرہ مرک مریک۔ داڑے جاری مروک اسہ بیان اسے ٹی سینیٹر محمد عبدالقادر پارے کہ اسہ سال اٹی پاکستانی انسانی اسمگلرآک بیوس پاکستانی تے ایران، ترکی، لیبیا ، یواے ای و اٹلی ٹی مزل آتیاسرکننگ نا جاگہ غا مرک انا است ہسون وادی تیٹی دکہ تسر ہنداوڑ اٹ ہزارآ پاکستانی کزیت کریر ایران نا کسر انسانی اسمگلنگ نا مکروہ دھندہ سال تیان برجاءِ ہرانا نتیجہ ٹی ہرسال سد آ بندغ مرک انا گواچی مریرہ دا انسانی اسمگلرآتا تعاقب ءِ کرسا ایف آئی اے ایران آن مسہ بندغ ءِ دزگیرکرینے اوفتیان اہم دستاویز و پاسپورٹ ہم دوئی مسنے۔ اوپارے کہ انسانی اسمگلنگ اٹی اوار ہندا گینگ ایران آن داکاروبار ءِ آپریٹ کریکہ دا ٹولی مخلوق ءِ چندی مقدسہ ہند آتا زیارت و روزگار نا جھانسہ ترسا مرک انا سوداگری کیرہ ساڑی آ دزگیر مخلوق پاکستانی تے عراق اسمگل کروک ئسر کہ برمتہ گر آک تاوان کن اوفتے برمتہ کریر ایف آئی اے اسہ سرسہب آپریشن اٹی مغوی تے آجو کرفیر و انسانی اسمگلنگ ٹی اوار بندغ آتے دزگیر کریر۔ چیئرمین قائمہ کمیٹی پارے کہ حکومت ءِ انسانی اسمگلنگ اٹی اوار گروہ تے پٹسا انجام اسکان سرکروئی مریک تانکہ معصوم مخلوق ءِ اوفتا دست برد آن رکھ تخنگ مرے انسانی اسمگلر آتا دا گروہ مچ آ دنیاٹی پاکستان نا بدنامی و رسوائی نا سوب مننگ ءُ داویل بے کچ سنگین ءُ حالیت اس اختیار کرینے حکومت نا زمواری ءِ کہ او مچ آ ملک اٹی فعال داوڑنا غٹ ٹولی تے چٹفے تانکہ سادہ لوح مخلوق ءِ مرک انا چنگل آن نجات ترفنگ مرے۔
