سریاب نا الس اینو بیست ءُ یک می صدی ٹی بجلی ، دیر ، گیس ، جا ن جوڑی تون اوار ایلو بنداوی آسراتی تیان محروم ءُ انشاءاللہ الس نا ویل آتے ایسر کننگ کن اولیتی بنداوتیا گام گیج کینہ، پاکستان پیپلزپارٹی نا راہشون و باسک بلوچستان اسمبلی  میر عبیداللہ گورگیج

کوئٹہ۔ 01 مارچ (اے پی پی) پاکستان پیپلزپارٹی نا راہشون و باسک بلوچستان اسمبلی  میر عبیداللہ گورگیج پارینے کہ سریاب نا الس اینو بیست ءُ یک می صدی ٹی بجلی ، دیر ، گیس ، جا ن جوڑی تون اوار ایلو بنداوی آسراتی تیان محروم ءُ انشاءاللہ الس نا ویل آتے ایسر کننگ کن اولیتی بنداوتیا گام گیج کینہ، پاکستان پیپلزپارٹی نا پندار وزیراعلیٰ میر سرفراز بگٹی وزارت اعلیٰ نا سوغند ہرفنگ آن پد الس ءِ ریلیف فراوان کیک۔ داہیت ءِ او جمعہ نادے آ تینا دفتراٹی اوڑدہی کروک آ حلقہ پی بی 44نا الس نا اسہ ڈل اسے تون گپ وتران کرساپارے ڈل صوبائی اسمبلی نا باسک میر عبیداللہ گورگیج ءِ سرسہبی و رکنیت نا سوغند ہرفنگ آ مبارکبادی پیش کرے و اسمبلی نا باسک ءِ  حلقہ نا ویل ویل آتیان سرجمی اٹ معلومدار کرے۔ بلوچستان اسمبلی نا باسک میر عبیداللہ گورگیج پارے کہ حلقہ نا ویل آتیان جوانی اٹ معلومدار اُٹ مستین اٹ حلقہ غان سرسہب مروک آ قوم پرست جماعت آتا اسمبلی نا باسک آک الس نا خذمت نا جاگہ غا بیرہ تینا بینک بیلنس اٹی ودکی کریر و الس نا ہچ ءُ خذمت اس کتور الس وونٹ انا کمک اٹ قوم پرست آتے مسترد کرے۔ اوپارے کہ حلقہ نا الس اینو ہم تعلیم، جان جوڑی، کنوئی آ ساف دیر، بجلی ، گیس و ایلو آسراتی تیان محروم ءُ کنا دا کوشست مریک کہ حلقہ نا الس نا متکن آ ودمدستی ایسرنا چاری  ویل آتا ایسری کن عملی گام گیج کین۔ اوپارے کہ حلقہ پی بی 44 نا الس کنے آ ہراپت انا درشانی ءِ کرینے اوڑآ انشاء اللہ پورو سلنہ۔ اوپارے کہ پاکستان پیپلزپارٹی میر سرفراز بگٹی ءِ وزارت اعلیٰ بلوچستان کن پندار کرینے اومیت ءِ کہ او وزارت اعلیٰ نا سوغند ہرفنگ نا دمدستی پد صوبہ نا الس ءِ ریلیف فراوان کننگ و الس اٹ مروک آ مایوسی ءِ چٹفنگ کن گام  گیج کیک۔