اسلام آباد۔ 01 مارچ (اے پی پی) مسلم لیگ و اتحادی جماعت آتا اومیتدار سردار ایاز صادق 199 وونٹ ہلسا اسپیکر قومی اسمبلی گچین مس۔ دزکش مروک آ اسپیکر راجہ پرویز اشرف اوڑآن رکنیت نا سوغند ہلک۔ جمعہ نادے آ قومی اسمبلی ٹی پوسکن آ اسپیکر نا گچین کاری کن پولنگ مس۔ ہراٹی 284 باسک آک تینا حق رائے دہی ءِ کاریم اٹ ایسر۔ پولنگ نا عمل 11 بجہ غانماز جمعہ غان پد برجائس اوکان پد سیکرٹری قومی اسمبلی ایلوعملہ تون پولنگ ایجنٹ آتا ساڑی گری ٹی گنتی کرے۔ کل 291 باسک آک حق رائے دہی ءِ کاریم اٹ ایسر۔ اسہ وونٹ اس مسترد مس۔ سردار ایاز صادق 199 وونٹ وخت اس کہ اونا مدمقابل سنی اتحاد کونسل نا اومیتدار عامر ڈوگر 91 وونٹ ہلک۔ گنتی آن پد سیوتی جماعت آتا باسک آک سردار ایاز صادق ءِ مبارکبادی تسر۔ اوکان پد پوسکن گچین مروک آ اسپیکر سردار ایاز صادق تینا حریف سنی اتحاد کونسل نا اومیتدار ملک عامر ڈوگرنا نشست آ ہنا و جمہوری عمل نا بشخ مننگ آ اونا منت واری ءِ ہرفے۔ ایاز صادق قومی اسمبلی نا 22 می اسپیکر گچین مس وخت اس کہ او داکان مست 2013 آن 2018 اسکان ہم اسپیکر قومی اسمبلی رہینگا۔
