پشاور۔ 01 مارچ (اے پی پی) سنی اتحاد کونسل نا مخ تف اومیتدار علی امین گنڈاپور خیبرپختونخوانا 19 می وزیراعلیٰ گچین مس ۔ او90 وونٹ ہلک وخت اس کہ اونا مقابلہ ٹی مسلم لیگ (ن) نا اومیتدار عباداللہ ءِ 16 وونٹ ملا۔ جمعہ نادے آ صوبائی اسمبلی نا دیوان پوسکن گچین مروک آ اسپیکر بابر سلیم سواتی نا کماشی ٹی اڈ ہلک۔ تلاوت کلام پاک آن پد اسپیکر صوبہ نا وزیراعلیٰ نا گچی کاری نا وڑوڈول نا پڑو ءِ کرے و پنچ منٹ اسکان ایوان اٹی گھنٹی خلنگا اوکان پد ہال انا درگہ غاتے بند کننگا۔ داوخت آ اسپیکر ایوان ءِ پارے کہ تدوک آ دے وزیراعلیٰ نا گچین کاری کن چار ایم پی ایز علی امین گنڈاپور ، ہشام انعام اللہ، زرک خان و عباداللہ پندارکاغد آتے جمع کرفیر ہراکہ سہی گوندنگار ولے اِرا اومیتدار زرک خان و ہشام انعام اللہ اوکان پد تینا کاغد آتے پدی ہلکر۔ اوکان پد وزیراعلیٰ کن باقاعدہ گچین کاری نا عمل بناکرے۔ ووٹنگ کن اِرا لابی جتا کننگاسس۔ اسمبلی اسٹاف نا کنڈآن ہڑتوم آ لابی تیٹی باسک آتا گنتی آن پد اسپیکر نتیجہ غاتا پڑو ءِ کرے۔
