اسلام آباد۔ 01 مارچ (اے پی پی) سینیٹر آک پارینو کہ درآمدی کولانا مقابلہ ٹی ہندی کولا ءِ اولیت تننگے، ننے ہندی وسیلہ غاتے کاریم اٹ اتسا توانائی نا تنکی تا توروئی مریک۔ جمعہ نادےآ سینیٹ نا دیوان اٹی السی اہمیت نا باندات آ ہیت کرسا سینیٹر تاج حیدر پارے کہ درآمدی کولا ہراریٹ آ ملک او بھاز زیات ءِ۔ داکان بھاز کم آ نن ہندی کولاآن بجلی ودی کننگ اُن، اسلام کوٹ اٹی یک و نیم سد میگاواٹ بجلی ودی کننگ اُن، سد میگاواٹ نا پلانٹ سکھر اٹی ہم خلکونن، کراچی میونسپل کارپوریشن ہم تینا سولر پارک جوڑ کننگ ءِ، بلوچستان اٹی ہم دا وڑنا بجلی فراوان کننگ مریک وخت اس کہ تدوک آ 10 سال آن پارلیمان ہم سولر آ چلینگ انگ ءِ۔ صدر نشین پارے کہ بروک آ سیشن اٹی داڑآ سرجمی اٹ بایدے شرہ مرے۔ سینیٹر مولابخش چانڈیو پارے کہ ملک اتی بجلی نا تنکی ءِ، ننے تینا وسیلہ غاتے کاریم اٹ اتسا داتنکی ءِ ایسر کروئی مریک۔ صدر نشین کمیٹی نا باسک آتا کارکڑد نا ستاءِ کرے۔ سینیٹر کامل علی آغا السی اہمیت نا باندات آ ہیت کرسا پارے کہ الس کبینی نا چکی ٹی تموک ءِ ۔ بجلی نا نہاد اٹی بے تحاشہ ودکی کننگانے۔ داوخت آ لس بندغ ءِ 82 روپئی فی یونٹ بجلی فراوان کننگ انگ ءِ۔
