اسلام آباد۔ 01 مارچ (اے پی پی) اسپیکر قومی اسمبلی راجہ پرویز اشرف پارینے کہ سنی اتحاد کونسل نا مخصوص نشست آتا بابت باندات الیکشن کمیشن تون ءِ ہنداخاطرآن او الیکشن کمیشن نا فیصلہ نا انتظار ءِ کیر داڑے ہرباسک نا فارم 45 و فارم 47 ءِ چیک کننگ مفک ننتون الیکشن کمیشن نا نوٹیفکیشن آن بیدس پین ہچ ءُ ذریعہ اس اف۔ جمعہ نادے آ قومی اسمبلی نا دیوان نا بناآ سنی اتحاد کونسل نا باسک آک ایوان اٹی ہنگامہ آرائی کریر۔ عمرایوب خان نا نقطہ اعتراض آ اسپیکر رولنگ ترسا پارے کہ ہموغٹ باسک آک ہرافتا قومی اسمبلی نا باسک نا حیثیت اٹ الیکشن کمیشن نوٹیفکیشن جاری کرینے او دا ایوان نا شرفمند باسک ءُ۔ عمرایوب خان پارے کہ دا ایوان پورو اف۔ نن تدوک آ دے ہم ہیت کریسن کہ اسپیکر دا بابت رولنگ ایتے۔ گچین کاری عمل ننا زالبول باسک آتا ساڑی مفنگ اٹی برخلاف کانود ءِ۔ نن انصاف و کانود نا بالادستی ءِ خوانہ۔ بیرسٹر گوہر علی خان اعتراضی ٹک آ پارے کہ آئین نا آرٹیکل 51 خواست کیک کہ ایوان پورو مرے ، اسپیکر دا بابت رولنگ ایتے۔ جمہوریت اٹی ہروونٹ انا اہمیت مریک۔ اسپیکرپارے کہ الیکشن کمیشن نا نوٹیفکیشن آن بیدس اسمبلی سیکرٹریٹ تون پین ہچ ءُ ذریعہ اس اف۔ الیکشن کمیشن وتواجہ ادارہ اسے۔ نن باسک آتا فارم 45 ءِ چیک کننگ کپنہ۔ بیرسٹر گوہر علی خان پارے کہ نن اسپیکر آن فارم 47 و فارم 45 نا ہیت ءِ کتنون۔ نن بیرہ تینا مخصوص نشست آتا بابت اسپیکر نا رولنگ ءِ خوانہ۔ رانا تنویر حسین پارے کہ 2018 نا الیکشن بدترین دھاندلی زدہ الیکشن ئس۔ داوخت آ مسلم لیگ ن نا گیشتری ءِ اقلیت اٹ بدل کننگا۔ سنی اتحاد کونسل تو تینا جماعت نا فورم آن گچین کاری تیٹی بشخ ہی ہلتنے۔ اوفتے مرے کہ الیکشن کمیشن تون رجوع کیر۔اسپیکر رولنگ تس کہ مخصوص نشست آتا بابت سنی اتحاد کونسل الیکشن کمیشن تون رجوع کرینے او الیکشن کمیشن نا فیصلہ نا انتظار ءِ کے دا چرجوئی ٹی اصل فورم الیکشن کمیشن ہی ءِ۔
