اسلام آباد۔ 29 فروری (اے پی پی) مسکوہی وزیراعظم محمد نواز شریف پارینے کہ مرغن جلاوطنی آن پد قومی اسمبلی ٹی پدی بننگ آ جذباتی کیفیت ءِ۔ تینا اُراغا پدی بننگ و پارلیمنٹ اٹی سوغند ہرفنگ آاینو بھاز خوش اُٹ۔ اوپنچ شنبے نادے آ قومی اسمبلی ٹی گچین مروک قومی اسمبلی نا باسک انا سوغند ہرفنگ آن پد گیٹ نمبر پنچ آن پدی ہِننگ نا وخت آ میڈیا تون غیررسمی گپ وتران کرسا داخیال آتا درشانی ءِ کرے۔ او تینا مسڑ وزیراعلیٰ پنجاب مریم نواز شریف تون اوار روانہ مسکہ۔ نواز شریف پارے کہ ملک ءِ بھلا چیلنج مون تروک ءِ داوخت آ غٹ ءِ اواری اٹ ملک و قوم ءِ مشکل آتیان کشنگ کن کوشست کروئی مریک۔ صحافی اسےنا اسہ سوج اسے آ نواز شریف جذباتی وڑاٹ پارے کہ اسہ بھلو وخت اسے نا جلاوطنی آن پد اسمبلی نا باسک انا سوغند ہرفنگ کنکن خوشی نا سوب ءِ۔ اوپارے کہ دا موقع کنکن خوشی و جذباتی کیفیت نا ءِ۔ ای ملک و قوم انا خذمت کن سنبرینگوک اُٹ پاکستان ءِ زرگزرانی وڑاٹ سوگو کننگ کن پبی گام گیج کینہ۔
