اسلام آباد۔ 29 فروری (اے پی پی) قومی اسمبلی نا اسپیکر و ڈپٹی اسپیکر نا عہدہ غاتیکن چندی جماعت آتیان تعلق تخوک آ اومیتدار آک تینا پنداری کاغد آتے سیکرٹری قومی اسمبلی تون جمع کرفیر ۔ پنچ شنبے نادے آ قومی اسمبلی نا دیوان نا بناآ اسپیکر قومی اسمبلی راجہ پرویز اشرف باسک آتیان سوغند ہلنگ آن پد پڑو کرے کہ غٹ آن مست قومی اسمبلی نا رول آف ممبرز آ ہمو اومیتدار دستخط کیک ہرا اسپیکر و ڈپٹی اسپیکر کن پنداری کاغد آتے جمع کرفوئی ءِ، مسلم لیگ ن نا سردار ایاز صادق اسپیکر، پاکستان پیپلزپارٹی نا سید غلام مصطفیٰ شاہ ڈپٹی اسپیکر ، سنی اتحاد کونسل نا ملک عامر ڈوگر اسپیکر و جنید اکبر ڈپٹی اسپیکر نا عہدہ کن تینا پنداری کاغد آتے سیکرٹری اسمبلی تون ایوان اٹی ہی جمع کرفیر۔ پنداری کاغد آتے جمع کرفنگ نا وخت انا چٹنگ و جانچ پڑتال آن پد اسمبلی سیکرٹریٹ اومیتدار آتا گڈیکو لڑءِ جاری کیک ۔ پوسکن آ اسپیکر و ڈپٹی اسپیکر نا الیکشن پگہ( جمعہ نادے آ) مریک۔
